曼城後衞布歷治經歷過前未婚妻佩龍塞爾同隊友泰利「劈腿」，因而經歷戴綠帽呢種男人最痛之後，已經重新振作，最近仲修成正果㖭！話說31歲嘅布歷治（左）同佩龍塞爾分手之後，喺舊年12月搭上咗英國人氣歌手法蘭姬（FrankieSandford、右）。呢位22歲美少女人靚聲甜，仲同布歷治鬼死咁癡纏，佢日前接受英國報章訪問，好大方咁話會嫁畀布歷治。法蘭姬話：「我希望我哋喺將來可以結婚，我家人同朋友都認為布歷治係好男人，同佢結婚，大家都唔會失望。」不過，法蘭姬亦話：「我家得22歲，我諗結婚生仔起碼要25歲後先諗。」