本欄於八月二十七日講及：「徐立之倘有任何錯失，豈是個人一人之事，香港大學嘅Court與Council成員，難道沒有責任？」
之後收到一位讀者來郵，讀者署名ACourtMemberofHKU，以下簡稱讀者Ｃ，佢在電郵指出三點：
（一）並唔係全部Court成員接到邀請出席八一八港大百年慶祝典禮，讀者Ｃ自己就冇收到請柬，所以佢懷疑並非所有成員都知道有呢個典禮。
（二）港大百年慶祝典禮（TheCentenaryCeremony）並未在「港大百年慶祝活動時間表」內出現，所有重要活動一年前已經決定咗，但八一八慶典從未見過，所以讀者Ｃ認為八一八慶典係特別為副總理李克強到訪而設，性質上係私人歡迎大會多過百年慶典，樣樣事情都籌備得好匆忙！
（三）整個八一八慶典以畢業典禮（Congregation）形式舉辦，所有坐在台上人士都要穿上學術袍（李克強除外），唯一唔同嘅，坐在台上嘅人士唔係Court成員（李國寶除外）。
總的來說，讀者Ｃ認為Court成員對整個八一八慶典並無發言權，但因為佢唔係Council（校務委員會，主席係梁智鴻）成員，佢唔知道校務委員會曾否討論或批准此事。
在港大管治架構，有三個主要組織，分別係Court、Council與Senate（教務委員會），以校務委員會權力最大，全校主要事務都要在校務委員會（相等於中文大學之校董會）討論。現在讀者Ｃ聲言八一八慶典並未在Court討論，外人有理由相信，咁大件事，副總理到賀噃，事先校務委員冇理由唔知，而只係由校長副校長們全權處理嘅，睇嚟梁智鴻主席應該澄清一下，將八一八慶典之來龍去脈至少向港大人解釋清楚。外間消息流傳，港大在八一八之前大約十日先至確定知道李克強出席八一八典禮，但呢個典禮（如讀者Ｃ所言），一年前並未擺上活動系列，相信係臨時之作，有關人等做到倒瀉籮蟹，不足為奇。