又一次令男人High爆！入戲院欣賞過福特GT40仿製版以及GT3RS等經典名車之後，《狂野時速5》又將引擎爆炸聲帶到入屋，講緊係新推出嘅藍光碟，支援高清DTS-HDMA5.1，尾段30分鐘更揹住十幾噸夾萬通街亂撞，Sub仔變身戰車引擎，小心炸到反屋呀！
記者：陳國輝
極速名車晒你冷
200架車名Bonus翻煲
製作有幾堅？睇唔夠頭10分鐘你已經中晒毒！古仔一開始就玩劫車，由於火車不斷飛馳，速度感極強，再加埋沙地上又有另一架作「內應」，佢從旁駕駛，另一人則利用山寨工具運走名車，淨係視覺效果已經爆燈。
但作為車迷，可能你會大嗌回水！梗係，片長130分鐘，但出場靚車超過200部，平均每架曝光都唔超過30秒，真係到喉唔到肺。好彩，藍光Bonus特別收錄超級辣車大晒冷，大家除可重溫劇情內出現過嘅DodgeCharger、DucatiStreetfighter等之外，就連重9.5噸嘅「大怪物」GurkhaF5，亦有專門介紹，不過，想睇晒200幾部咁多，唔好太貪心囉！
加插槍戰 低頻力水足
跟以往幾集有啲唔同，好似第三集《東京飄移》，就有八成故事都發生驚險嘅鬥車場面；今集除咗同你講車經，仲加入大量槍戰元素，故事稍為大路。啱睇與否見仁見智，但如果用嚟測試不同種類嘅低頻效果，呢隻Blu-ray應該啱晒胃口！
音效支援高清格式DTS-HDMasterAudio5.1，印象最深刻係劫車分子出動嗰陣，未見其車，先聞其聲，一股強勁引擎突然之間由Sub-Woofer爆出嚟，連記者身邊隻小狗亦被嚇到彈起，半夜三更煲碟小心俾鄰居投訴！至於槍戰下嘅連串爆破聲也甚具震撼力，但由於大部份外國Blu-ray已經有呢種水準，論特色，始終唔及搵引擎聲做測試咁過癮。
室內飄移 分鏡連環睇
講番藍光版Bonus，除咗可以欣賞戲內經典名車，導演JustinLin更會專程解構幾幕飄移製作花絮！必睇位首選沙漠劫車，當然亦唔少得室內飄移嘅驚險拍攝場面，佢仲會展示分鏡，逐步向你講解。至於勁例牌嘅導演專訪、演員訪問以及刪剪片段，Bonus內亦有得睇番，全片長達70分鐘，夠你過足戲癮。
Profile
格式：Blu-ray
畫面：1080P/2.35比1
聲效：DTS-HDMasterAudio5.1、DTSSurround5.1
片長：130分鐘
特別收錄：超級辣車大晒冷、刪剪片段、火車械劫驚險特技揭秘、導演監督飄移實況、火車械劫多角度分鏡
