耀才證券（1428，圖）噚日發盈喜，話9月底止中期業績表現有顯著增長。
不過，另一邊廂就有位陳姓嘅員工，向華華爆料，話耀才凉薄，將花紅改做每月勤工花紅獎，如果員工請病假一日，嗰個月就要扣一成花紅，請兩日就扣四成，請3日就冇晒花紅，請病假4日全年都冇花紅。陳生話，咁即係想員工用有薪年假當病假放。
華華問耀才，發言人承認，喺9月1號開始就有上述嘅政策變動，將員工嘅工作表現、出席率計入勤工花紅獎考慮之列。佢強調冇扣減員工工資，以往花紅一直都係視乎公司業務表現，酌情畀員工。
即係話，人工畀足就唔係犯法，至於花紅，本來就唔係奉旨一定有㗎啦，陳生聽得明嘛！