中環人呢期最熱門話題，除咗禿鷹黑影，就係下屆特首跑馬仔邊個率先霸到頭位。不過，香港作為國際金融中心，未來財金官員班底，亦都係京港兩地以至市場中人，金睛火眼到實。
梁鳳儀上位有望
華華早前提過，有北大人接觸過金融沙皇白頭任，探吓佢東山復出嘅意向，不過退休後嘅任總，會否再接燙手山芋，就天曉得。除咗白頭任，現任金管局總裁陳德霖傳聞亦係財爺候選心水之一，但佢總裁任期5年至2014，同特首任期唔同步。仲有係，如果陳德霖真係再上一層樓，佢喺國金88樓個總裁位，邊個夠班坐呢？
金管局肩負本港貨幣金融穩定使命，權力來自財爺授予，所以委任人選亦要由財爺起動，背後一定諮詢過特首，同埋得到北大人祝福。華華聽中環金融人話，陳總昔日愛將、現任財經事務及庫務局副局長梁鳳儀，出任副局長後狀態一直甚勇。伊人任期到明年9月，隨煲呔政府換朝結束，「珠姐」（梁鳳儀洋名Julia諧音）去向，自然惹人注目。
至於金管局三位現任副總裁，除咗音樂才華橫溢嘅彭副總年過五十外，其他兩位都處於不惑之齡嘅盛年，相信隨住新特首選戰展開，其他關連人士嘅音樂椅猜謎，都會相當熱鬧。
李華華
mailto:[email protected]