戀上大哥的皮床

戀上大哥的皮床

多用途七人車永遠不乏捧場客,難怪市場上MPV車多得眼花撩亂,作為日本MPV老大哥的三菱Grandis,風頭似乎被後起之輩蓋過,老大哥唔想變過氣大佬,當然要為自己改吓身。代理最近為Grandis提供DeluxePackage,將皮椅摺叠變成一張大床,實行變身皮氣大佬。

記者:趙慧敏 
攝影:周旭文 
Model:CatherineWong@Zmodel

軟軟皮氣享受

當香港MPV市場尚未發展到今日咁熱鬧時,三菱已經以Spacewagon現身市場,直至後期才被Grandis所取代,所以話佢係MPV界老大哥,絕對沒誇張。雖然現時MPV已走到去戰國年代,大中小型任君選擇,不過Grandis仍長賣長有,當然有其優點。
言而Grandis已露面了一段時間,但沒有過時感覺,尤其車頭的斜面大銀幕,視野度極高外,亦可為車廂帶來充裕開揚感,身處其中,猶如進入一個陽光充沛嘅小蝸居。雖暫時未聽聞車廠有為Grandis改款嘅舉動,不過代理都帶咗啲新意畀捧場客,提供DeluxePackage,追加一系列豪華配備,包括由絲絨座椅換上真皮座椅、6.1吋Kenwood顯示屏幕及音響,加埋新增嘅後泊車顯示鏡頭,就算唔係揸慣大碼MPV嘅駕駛者,泊車睇位都安全感十足。雖然新配備全部屬代理在本港加裝,不過質素一啲都唔輸蝕,尤其係真皮座椅,皮料柔軟承托力十足,帶畀你另一種「皮氣」享受。

■由頂延伸的垂直煞車燈,視覺效果一流。

■巨大空間,多多雜物都放得下。

■6.1吋Kenwood顯示屏幕睇住泊車之餘,還有音響系統。

■中排座椅空間十足,加上小型摺合式桌面,非常方便。

■追加的後泊車鏡頭就算生手揸車,都安全感十足。

毋須飛甩老套

雖然是車壇大哥級人馬,不過Grandis設計絕對襟睇夠型,事關車形已充滿時代感,除車身充滿流線型設計外,當中確要歸功於頭尾燈設計,車頭呈銳利三角的超白光頭燈、特大霧燈,為家庭車的外形添加跑味。至於車尾由頂而下的垂直煞車燈,透明外殼下的圓形燈泡,就算塞車跟住你車尾,都帶嚟視覺享受。
車廂佈局亦啱晒大人細路哥,以2+3+2設計,駕駛席留有中央通道,令一二排穿梭兩邊都無問題,配合尾排自由摺叠及雙天窗等設計,都屬MPV必要條件。新一代Grandis用上2.4公升MIVEC直四引擎,最大輸出165匹馬力,當轉數達4,000轉時,就可釋出22.1kg-m扭力,配上INVECS-II4前速加減自動波,雖然說不上勇猛的性能,就算滿載七人,絕沒有半點吃力感覺。

■雙天窗設計,令二三排都有充滿開揚感覺。

三菱Grandis

引擎:2,378ccMIVEC直四
馬力:165ps/6,000rpm
扭力:22.1kg-m/4,000rpm
傳動:INVECS-II4前速+/-自動波
售價:$239,900
查詢:27211111(寰宇汽車)