京城近兩周熱爆食店姚記炒肝，人人排住隊Order一客「副總統79套餐」。
話說港大8．18事變當日，北京鼓樓一帶也出了狀況。朝早10點有政府人員進入姚記炒肝，向店主姚燕表示，一陣有名人到店內幫襯。奇怪安檢人員冇入廚房檢查食物是否有毒，也冇檢查後貼上封條，更冇吩咐姚燕不准穿上「Obamao」Tee。此Tee一度在秀水商場風行一時，諷刺奧巴馬討好共產中國賺人仔。奇怪安檢人員冇吩咐他不可談論美軍在伊拉克侵犯人權行為。而更奇怪係安檢人員冇圍起用餐區或要求清場封店只招呼貴賓，但就留下兩位女老外一老一少提早霸位。
保安低調的公關藝術
下午1點半鐘，姚燕見有5個客人入內，一馬當先是一位中國人及白頭老外，他認得是新駐華大使駱家輝，白頭老外就是美國副總統拜登，另有幾位戴黑超特工，加起來坐了3張枱。菜單早已寫好，但拜登仍親自去收銀櫃下單。從《新京報》報道，姚燕才知道霸位女士係駱家輝大使夫人Mona同拜登孫女，他們食了5碗炸醬麪10個包及冷盤共79元，店主事後向傳媒大讚拜登隨和，內地網民也大讚親民GoodShow。特工保安工夫低調，唔代表低水平，相反保安高調擾民，亦唔代表盡責有用。
這場面似曾相識，當年克林頓訪港，便曾與愛女切爾西突襲蘭桂坊同四眼仔市民揸手，現場只見4名特工，但其他隱藏特工就唔知有幾多。美國總統副總統保安低調，目的係為了做一場有效益的公關親民Show。這類Show不能太假，太過似舞台劇，若店主食客係老臨，會被記者踢爆，當中拿揑就係政治公關嘅藝術。
李克強訪港3日廿多場活動，全無機會接觸真正普通市民，由香港市民把口去稱讚佢。為求零風險保安工作超高調，結果公關Show效益低，做咗等如冇做，為乜？
政治公關Show不是要令自己FeelGood，而係Impress你的觀眾。炸醬麪拜登食唔慣冇所謂，只要店主姚燕稱讚，內地傳媒網民激賞，北京市民排隊幫襯指名要「副總統79套餐」，掂！
添馬男