開心飛起1：老陳秘店搵食　過江搶黑豆沙月

開心飛起1：
老陳秘店搵食　過江搶黑豆沙月

香港人最愛捐窿捐罅搵嘢食，但面對澳門的橫街窄巷亦惟有舉手投降。幸好小記今次找來飲食達人老陳帶路，由早到晚掃勻舊區名不經傳的平民美食，想食好嘢，唔一定要去酒店！

記者、攝影：李鑒泉
Model：Anisa
鳴謝：CirquedeSoleil

8:00am　八月十三前沽清

「如果以為自己已食勻澳門，那就大錯特錯！」為報章、網站寫飲食的專欄食家老陳成日四圍發掘好味食肆，今次帶我們到紅街市旁的「鳳凰餅家」試玫瑰黑豆沙月餅，這家族經營餅家已經有逾42年歷史，老闆光哥笑言每日清晨3、4時已準備製餅，全部餅類不含防腐劑，不放過夜，保證新鮮。而伍仁甜肉月餅更是招牌貨，用上欖仁、麻仁、糖冬瓜、杏仁及瓜子，入口有嚼勁，而modelAnisa就勁buy少少甜的玫瑰黑豆沙月，食晒一個都唔覺膩，不過想食就要趁早，因為平均農曆八月十三左右就已經賣完，手快有手慢無！

■基本上全日都有月餅出爐，保證新鮮。

■每次月餅出爐時，店門都會快閃出一條買餅人龍。

■老闆光哥（左二）一家凌晨3點就起身整餅，捱到個個金睛火眼。（a）

■日賣逾百個的玫瑰黑豆沙月餅甜而不膩，每個$27。（a）

a.鳳凰餅家

地址：羅約翰神父街3號
營業時間：07:00-17:30
電話：（853）28210766
前往方法：紅街市滙豐銀行旁小巷直入

11:00am　爆汁豬扒滿油香

左看右看這家綠色門面的茶餐廳沒啥特別，但從早上11時起，店內長期門庭若市。小記等人不過來遲一步，老陳極力推介的蛋撻經已賣清光，惟有改點自家製豬扒包，咬落去豬扒肉汁四濺，而包身亦沾滿油香，不輸澳門幾家著名豬扒包餐廳。另外點的菠蘿油，那塊牛油早就在中間溶化，遠遠都能聞到其香味，配上一杯茶味特濃的凍奶茶，門口又有傳統西餅任你帶走，Anisa都忍唔住大叫：「好滿足！」

■雖然包點份量唔算大，但女仔要飽肚仍綽綽有餘。

■睇佢人仔細細，三扒兩撥後連湯都飲埋，約$19（b）

■牛油於菠蘿包中溶化，釋放陣陣香味，每個$6.5。

■豬扒包肉汁四濺，每個$16

b.新鴻發咖啡美食

地址：賈伯樂55號
營業時間：06:00-18:00
電話：（853）28530432

3:30pm　嘆咖啡機冲奶茶

小記向來對連鎖餐廳沒甚麼好感，來到檀香山咖啡門前已經想打退堂鼓，連Anisa都忍唔住問老陳：「點解帶我們食連鎖餐廳？」答案原來是為了嘆杯機製熱奶茶。
檀香山咖啡賣咖啡已經有60年，但無啦啦轉行賣奶茶又得唔得？店員首先向杯中噴泡，然後放在蒸餾機下等奶茶從機身導管慢慢流出，「咦，乜咁似冲咖啡？」看清楚發現店員是用冲Espresso的咖啡機壓茶葉，所以奶茶表面有一層泡沫，但茶味略淡。午餐必食牛脷意粉，蒜茸汁滲入牛脷之中，口感一流。

■由於人人都點熱機茶的關係，店員冲茶冲到手軟，每杯$12。

■用咖啡機來冲奶茶，你又見過未？

■一邊嘆熱機茶一邊食葡腸包，就這樣已經可以消磨整個下午。

c.檀香山咖啡（盧九分店）

地址：羅利老馬路12號G座
營業時間：08:30-19:00
電話：（853）28584339

4:30pm　狂食$10芝士蛋糕

雖然酒店餅房出品質素通常有保證，但坊間亦有唔少餅店的西餅質素可以與之睇齊，如雪利斯薄脆就是其中之一。西餅每日從工場新鮮製造，大約11時就已送到分店，不過個別款式如濃芝士蛋糕等幾乎即時沽清，明天請早。店內最好賣的是大大件拿破崙蛋糕，蛋糕份量十足，其中又混有芒果，要兩個女生才吃得完，所以日賣逾百件。日式芝士蛋糕軟硬適中，唔似坊間某些店舖一碰即爛，一件只不過是$10，食多幾件都唔肉赤。

■由於餅房每日只會出餅一次，所以有些餅款如濃芝士蛋糕等未到下午就售罄。

■女人果然有兩個胃，有品食就永遠唔覺飽。（d）

■軟硬適中的日式芝士蛋糕，每件$10。

d.雪利斯薄脆

地址：羅利老馬路22號B榮慶大廈地下
營業時間：06:30-20:30
電話：（853）28528314

8:00pm　賭場嘆得獎中菜館

既然過大海，無理由唔去賭場玩兩手，即使賭場內有唔少餐廳，但能稱得上「好食」的選擇其實唔多。早幾年贏得世界金廚大賽「特金獎」的回力美食中心就藏於回力場旁邊，雖然無金碧輝煌的招牌，但菜式花臣多，如獲獎的罐燜牛肋肉，混入高麗參的醬汁熬足十多小時，再與牛肋肉一齊燜至腍身，牛肉味濃，Anisa不經不覺都食咗幾件。嗜海鮮者必試家鄉蘿蔔糕炒奄仔蟹，除蟹膏外，蘿蔔糕中還有條條蘿蔔絲。相對而言，茄子釀咕嚕肉就更考功夫，大廚將五花肉釀在茄子中再掃上蛋漿炸至金黃，味道仲帶點清新！

■面對巧手小菜，老陳（左）和Anisa都食指大動。

■得獎的罐燜牛肋肉肉味香濃，例牌$98/4件。

e.回力美食中心

地址：新口岸回力球場地下及閣樓
營業時間：11:00-04:00
電話：（853）28725222

1:00am　消夜怒呷糯米酒

唔經唔覺已玩足一日，上船返香港前當然要來個最後衝刺！我們一行數人立即飛的去黑沙灣食消夜，豈料司機話不懂去永華街，準備下車時他反問我們：「係咪去石獅？」石獅美食原來已是地標，認真誇張。
雖然天氣仍然酷熱，但人人都叫秘製糯米酒雞煲，食客可將走地雞放進煲中，名副其實是食幾多落幾多。白灼螄蚶更是小記心水之選，因為螄蚶在滾水中開殼後便即時撈起上碟，配以特製辣汁，盡顯鮮味！而老闆紅姐自家釀製的糯米酒，入口暖意四溢，最後小記都忍唔住買咗幾支返香港做手信。

■老闆娘紅姐自家製糯米酒，內裏有浸足3個月的竹絲雞蛋，有緣先有得食。

■食消夜又點少得糯米酒雞煲，每煲$128。

■老闆紅姐為人和善，與食客打成一片。（f）

澳門大西洋銀行由九十年代起先後五度推出新鈔，除面額50元紙幣外，其餘面額鈔票大多於05年改印上大西洋銀行大廈圖案。50元鈔票最終於09年改版，正反面分別為大西洋銀行大廈及西灣大橋。

TravelMemo

持香港居民身份證毋須簽證。澳門駐港旅遊局：28388680

ZAIA門票連船飛套票，包A區座位門票及金光飛航來回港澳船飛，套票價$888起，小童$488起。查詢：31288288

240V，三扁腳插座

1港元約兌1.03澳門幣（文中價錢已折算港元）

下周短暫時間有陽光，26-32℃