SOHO中國（410）董事長潘石屹喺微博上粉絲超過640萬，人氣架勢過唔少港台一線藝人。無他，潘總敢言又幽默，金句多到「金句天王」黎明都要企埋一邊。繼早幾日做完老鼠，形容自己唔會輕易俾「調控」呢隻貓捉到之後，噚日又變身曉飛青蛙，送咗頂高帽畀微博。
話說潘石屹喺微博話：「用微博前是井底之蛙，用微博後從井裏飛了出來，看到一個無限的世界。有人在井裏，有人在天上。我們要讓更多的人從井裏出來。」唔知潘總身家厚者，以為佢騷想做微博代言人。不過，堂堂上市房企老闆自認井底蛙，呢種精神真值得大家學習。華華覺得，以潘總今時今日地位，就算係青蛙，都一定係青蛙王子。