7月錯報前國家主席江澤民去世，對於一直風雨飄搖的亞視，真係雪上加霜。當時曾傳出主管ATV新聞部的梁家榮辭職，但遭亞視否認，大家以為冇件事，不過我哋知道，梁去意已決，日內就會離開亞視。
亞視屋漏兼逢連夜雨，員工對王征怨言日深，更認為江澤民死訊單料王責無旁貸。亞視最大的挑戰還在前面，據我哋所知，電盈（008）、有線寬頻（1097）和城市電訊（1137）最快今個月底就會獲得免費牌照，可以好快推出服務，王征同埋低調大股東黃炳均究竟有冇能力和財力，團結上下迎戰？還是難挽狂瀾，人員將會四散？睇睇亞視近期的節目編排和質素，真係無法樂觀。
亞視立立亂，幾年來股東之間、管理層當中的紛爭無日無之，鬧劇連場。07年加盟的梁家榮，巧婦難為無米炊，對外對內頂住無數壓力，撐到今日，真可謂仁至義盡。
梁家榮70年代已經任記者和主播，係十分資深的新聞工作者，先後任職佳視、TVB、經濟日報的ETVision，07年出掌亞視領導新聞部。08年張永霖同王維基的短暫掌政期間，梁也曾請辭，但很快就因為王維基上任12日後即辭任CEO而還原職務。佢今次真係要同ATV講Byebye，但數碼電台、新免費電視、新免費報紙等大量新平台等住開波，傳媒的熱鬧境況多年未見，以梁家榮的資歷，相信不愁出路。
港交所勢揸走法拉利
投資銀行積極獻策，游說頂級跑車品牌法拉利到香港上市，香港股市能否繼Prada（1913）之後，再增添一間意大利名牌企業，除了睇法拉利母公司Fiat制唔制，還要視乎新加坡點出招攔截。
星洲力撬嘉能可過檔
儘管法拉利主席LucadiMontezemolo不只一次否認IPO計劃，但我哋知道持股近九成的意大利最大車廠Fiat，確有意藉法拉利上市套現減債，所以投資銀行相信成事機會甚高。但一如過去1年，新加坡都會嘗試搶奪香港的外國企業，尤其係頂尖公司的IPO，相信法拉利都不會例外。
我哋又知，新交所曾經積極游說全球最大的商品交易商嘉能可（805）改變主意，由「倫敦+香港」改為「倫敦+新加坡」兩地上市，由於最後無功而還，一般人未有很在意獅城的進取手段。直到成功爭取曼聯轉軚，新加坡才正式有所突破，也引起環球金融市場注目，如果能再接再厲，再下一城攞到法拉利IPO，起碼氣勢上可以進一步拉近同香港的距離。
怎能唔Sell中國概念？
不過法拉利揀香港IPO太過順理成章，只要Fiat沒有A、B股這類特殊要求，新加坡今次要搶真係難度高。
法拉利去年在中國足足賣出近300部車（全球都係賣6000幾部），增長五成，有說今年上半年增長更勁，連同港台兩地，大中華市場已賣咗近380部，超越德國成為第二大市場，僅次於美國。其實法拉利進軍大陸市場僅僅6年時間，但係5年前已經將亞太區總部設喺上海，重點拓展內地市場。
法拉利上市冇可能唔重點Sell中國概念，加上香港已經有不少上市汽車股，個場夠旺，又有同鄉Prada成功登陸做先例，只要Fiat拍板分拆，就必然會揀香港。新加坡唯一優勢，可能只不過係F1賽車的其中一站。
8月新股捧蛋
法拉利估值可能達到500億元，集資額隨時過百億元，算是大型IPO，企業的名氣加產品獨特性再加中國奢侈消費概念，投資銀行覺得很好Sell，但可能要等到出年才會踩油衝刺，難為目前淡靜的IPO市場冲喜。
上月是近5年來首次錄得零新股上市的8月份。暑假的IPO市場，傳統上較為淡靜，過去也經常只得一、兩隻新股在8月內掛牌，2006年與今年一樣係捧蛋。今年IPO市場會唔會特別差，要睇9月份徐工等3、4隻新股能否如期完成，如果因為期間市況動盪而不幸滑鐵盧，投行裁員潮隨時加劇。
投行裁員有因
IPO淡靜，影響所及係金融中心最吃香的律師、會計師、投資銀行家、經紀等人的花紅同飯碗。上半年唔少IPO臨尾煞停，又或者拖住唔去馬，律師等專業服務通常都可以按進度收ProgressFee，但SuccessFee佔一個頗大比重，以一單普通IPO由頭到尾律師行收100萬到200萬美金計，一日未完成單Deal，律師最多收得七、八成。
投行比律師和會計師慘情，因為主要靠賺佣金，IPO集資越多賺得越多，如果好似光大銀行一樣去到最後一刻才叫停，就會失去八、九成預算收入，之前做了幾多工夫都冇用。多家投資銀行近日其實已有小量裁員，如果第四季市場沒有顯著反彈，肯定會有更多人執包袱。
