上周港股一度彈升至21000附近，升勢既急且勁，可以說是典型熊市反彈的特徵，一是為了挾淡友，皆因在牛熊證分佈上看到，大市越升，便越多投資者買熊證造淡，大戶愛擇肥而噬，自然唔會放過此機會；二是要引人入貨，大市之前一跌再跌，就算有買貨的投資者，由於恐懼的關係，注碼相對也不多，到隻隻個股爆升，見手上唔夠貨，自然又想追，結果大戶又在這個時候將貨源派到散戶之手。
全面投資長短兼備
一個交易日內，有幾隻中型股出現雙位數字升幅並不稀奇，不過當有一大堆齊齊急升，而且不少是長插長有之輩，實在無辦法唔提高警覺。不論大市抑或個股，類似情況在未來一段日子相信仍會再次出現，大家要緊記每次急升，尤其是醜股也大翻身的日子，便是出貨之時。
如果今次無趁急升減持的投資者，其實不用太擔心，一來筆者講過頂部多是圓的，即使之後無法升穿上周高位，但應會再上試多一兩次才會確認頂部。二來美股下跌，我估計又是有心人玩的把戲，希望推使聯儲局出招救市，之後大戶可利用對救市的憧憬，再炒上去，這該是另一次出貨時機。
有不少投資者擔心若美國真係再出QE救市，將會進一步推高通脹，如果唔投資，豈不是任由銀紙貶值？不過有時投資或投機都好難定分界，好像索羅斯，好多人都話佢係成功的投機者，最著名的戰役就是在90年代沽空英鎊及亞洲貨幣，但從另一個角度來看，其實他是在發現泡沫後，投資泡沫爆破，所以如果說買股票就是投資，眼光似乎太狹窄，因為股市唔會得一個方向，投資理應長短兼備，懂買上時也要懂買落，這才算得上全面。
張士佳
寶來證券（香港）資產管理部董事
本欄逢周一、三、五刊出
mailto:[email protected]