大市上演「殺熊記」後急回，但本欄上周五推介中信大錳（1091）表現硬淨，最多升5.5%，收市報1.46元，仍升0.7%，成交不俗，應有力再上層樓。
風電股近日離奇強勢，中傳動（658）同金風科技（2208）都逆市抽高，似乎見底轉勢了，可以入一注試試水溫。不過，比較埋業績同圖表，華能新能源（958）最值博。
先睇業績，華能新能源中期純利飆1.3倍至6.73億元，遠超招股書預期，相當於全年預測63%，預測PE僅8倍。至於中傳動及金風，盈利分別倒退49%同45%，預測PE分別10.2倍及11.6倍，相比之下華能新能源可謂「平靚正」。此外，公司上市不足3個月，現價僅潛水15%，蟹貨較少。反觀過去一年，中傳動及金風暴瀉7成，要短期內爆上去，絕不容易。
業績公佈後，大行齊齊叫買華能新能源，高盛料其產能續升，加上國策扶持，目標2.80元。花旗料未來兩年集團複合年增長率達79%，估值又吸引，睇2.75元。
睇埋圖表，華能新能源業績後由1.70元起步，三個交易日飆30%，整固一周後，上周五突破旗形抽升5.5%，收2.12元。本欄唔大貪，今日開市買，目標2.40元，博賺13%，跌穿2蚊止蝕。
魏力