剛過去嘅假期，唐牛同一大班舊同學飯敍，之後仲圍埋玩紙牌大富翁。雖然遊戲規則同細個玩開嘅大富翁完全唔同，但現金流依然係好緊要。簡單啲講，如果玩家手頭上冇錢，但又要向其他玩家交租，就只能夠將旗下物業賤賣。
喺現實世界，現金流對地產發展商同樣重要，但近期內地行家喺呢方面就遇到多重夾擊。首先，阿爺擴大存款準備金徵收範圍，變相進一步收緊流動性，傳聞內地四大銀行上月新增貸款只係得1400億人仔，數字係年半以來最低，內房股要融資變得十分吃力。此外，限購令由一線城市蔓延到二三線地區，保障房建設亦如火如荼，賣樓數目自然大打折扣。有發展商戲言，今年金九銀十隨時變成銅九鐵十，想用貨如輪轉呢招撲水，難度大增。
溫總早幾日仲講到明，房地產調控開始見效，但要全面到位，仍然需要時間。中央擺到明唔會放軟手腳，內房股仲點會有運行呢？
唐牛