衞冕的傑志昨午在甲組聯賽揭幕戰失威，排出怪陣之下，僅靠「足球先生」盧比度下半場的12碼逼和晨曦，搶回1分。如此表現難怪領隊伍健直言「唔收貨」，球迷賽後亦狠批踢得差，悶親球迷。
有「港版巴塞」之稱的傑志，昨日在有近1,700名球迷入場的揭幕戰，當然想打響頭炮。不過就算於主場將軍運動場迎戰積極擴軍的晨曦，甫開賽就明顯未能延續上季強勢，當中後防作出多個調動，球員踢來顯得不習慣，中場缺林嘉緯下，大膽起用年僅18歲的顏樂楓踢正選，組織能力大減，加上誤傳頻頻，令晨曦佔到相當優勢。開賽20分鐘，晨曦已藉新加盟的梁子駿門前建功，助球隊半場領先1:0。
靠盧比度入12碼扳平
易邊後，傑志換入黃洋及陳文輝，而丹尼及盧均宜踢回慣常的左右後衞，發揮略有改善，迅即在47分鐘博得12碼，由盧比度主射扳平。可是傑志未能乘勢施壓，若非門將王振鵬救出晨曦中鋒巴利的近射，傑志隨時1分不保，最後雙方打成1:1完場。
傑志總領隊伍健表示，球隊有不少傷兵，教練甘巴爾在中後場陣容作出好些調動，個別球員要踢不慣的位置，上半場踢來不習慣，影響整體運作：「下半場作出調動，球員踢回其正常位置，發揮是有點改善，但絕對不是球隊應有水準，整體來說是不收貨。」
伍健：唔收貨
傑志主力盧均宜賽後坦承，球隊發揮不出應有水準：「上半場踢得差，這多少與林嘉緯因傷缺陣有關，而下半場作出好些調動後發揮較好。球隊從西班牙返港集訓後只練仿真草，球員轉到真草地比賽，適應上是有困難，影響到傳球質素。」傑志下場聯賽於18日上演，會繼續在將軍澳運動場對和富大埔。
晨曦教練列卡度賽後對未能全取3分感到可惜，因球隊有較多入球機會，只是未能把握：「我們賽前安排球員翻看上季作客大敗傑志的比賽過程，今仗加強整體中場壓逼，發揮令人滿意，未能全取3分有點不值，與前線攻擊球員未能把握機會有關，而球證（廖國文）好些判決對我們不利。無論如何，首戰賽和上屆冠軍是好開始，亦證明隊有實力挑戰列強。」本報訊
《花絮》
傑志banner搶晒鏡
傑志同晨曦兩班球迷都相當落力打氣，個個都想自己支持嘅球隊響頭炮，但論氣勢，主場嘅傑志就贏成條街，佢哋嘅球迷區掛咗一系列嘅橫額（圖），張張印住球員嘅嘜頭，相當有心思，又夠搶眼，仲好有J-League嗰種氣氛。
甘巴爾匿埋場邊睇波
傑志教練甘巴爾噚日帶埋老婆同聽日就兩個月大嘅囡囡（圖）睇波，見佢老婆推住囡囡入場，佢就仲喺出邊踱嚟踱去，佢因為仲坐緊波監，唔准入場，要周街匿埋睇波。完賽後，佢話遠處睇住球場個電視大銀幕唔係太清楚，好彩，佢仲有一場波監就解禁啦！
大頭仔蒲頭撐晨曦
噚日話晒揭幕戰，電視又直播，喺鏡頭面前，點都要做得好好睇睇，難怪多支甲組包括南華、大埔、屯門同深水埗都拉大隊撐場（左圖），好可惜始終都係唔爆棚。近年本地波稀客、「大頭仔」胡國雄（右圖）亦有現身，佢直話直說：「我嚟唔係支持本地波，我係嚟撐晨曦！」
靚女主持蝦碌片出街
now噚日搵大哥瑜同招積呢對「金猴」組合直播本地波，幾有親切感。佢哋亦都好有部署，賽前訪問操練做到足，好過免費台多多聲。不過，可能第1次關係，女主持依雯中場訪問時就出現咗蝦碌，話說原本約咗伍健做直播，點知撞正傑志半場輸緊0:1，伍健要入更衣室同球員訓話而甩底，直播室（圖）工作人員又唔醒目，累依雯儍更更試機嘅40幾秒出咗街。
