政府派錢，第一批人士（一九四六年或以前出生）在八月二十八日星期日開始登記，第一日就有三十二萬人到銀行及郵局入表，可見長者十分重視政府派「增長花紅」。為幫助各位記得登記日期，左丁山不厭其煩，做一次文抄公，良機勿失：記得依時去登記呀！
（一）一九四六年或之前出生：八月二十八日開始
（二）一九四七至一九五六：九月十一日開始
（三）一九五七至一九六六：九月二十五日開始
（四）一九六七至一九八一：十月九日開始
（五）一九八二至一九九三：十月二十三日開始
十八歲人士最關心有冇份，如果在二○一二年三月三十一日就滿十八歲嘅，有份收六千元㗎，一九九四年四月一日出生嘅，對唔住，等下一次啦。
八月二十八日星期日飲茶時份，碰到老早移民到英國嘅廚師T，佢在彼邦結婚生子，一家四口回港澳探親。因為佢有澳門身份證，收完澳門利是又收香港紅包，自然笑得好爽，佢嘅年齡大概係第四組別，仲要等成個月先至可以登記。不過廚師T話：「我知道可以上網登記或者下載登記表寄返嚟嘅啫，我有個香港銀行戶口仲未取消，收錢冇問題。喺唐人街，呢單新聞好轟動呀，我識得嘅廚師、企堂、管理人員，有香港永久身份證嘅，個個都話要返嚟香港攞錢。返嚟一行，當然要錢，但在淡季返嚟，來回機票唔駛六千蚊，咪當作香港特區政府請我地返嚟探親一次囉。好多香港移民在英國餐館日捱夜捱，好耐未返過嚟，呢次係最好機會，希望特區政府每年派六千！」
哈，啱啱收到旅行社推銷電郵，澳洲Qantas近日有來回倫敦機票優惠，雙程來回只收四千五百五十元，合晒香港移民心水。因香港派錢而受惠嘅商業機構，飲頭啖湯嘅可能就係航空公司，住在英美加澳紐嘅香港永久居民，一時之間計唔到有幾多，人人都趁機返港一行嘅話，啲航機會多咗好多生意。賓架C在上星期日收咗好多長者登記，打電話嚟提醒：「左丁山，唔該提一提，我發覺一啲長者填表竟然照抄樣本，填上嘅名字照寫陸千圓，唔好呀，要填番自己身份證嘅名字呀！」