蘇永康記性很好，好的、壞的、靚的、醜的，
他都記得一清二楚。
2002年8月台灣藏毒被捕，勒戒11日。
2003年8月跟新加坡太太馮麗清離婚。
2004年10月10日梅艷芳生忌，內地拍劇過冷河，
在星光下跟梅姐心靈對話後決志，決定要重新開始。
2006年3月23日陳奕迅婚禮上認識現任女友Anita。
2008年11月復出香港樂壇，九展開騷，之後揚言不會再出廣東碟。
四粒半搖頭丸毀了他的黃金十年，
蘇永康的中年危機比任何男人都來得早，
只有勇敢面對，永不放棄的人生態度，
才值得擁有更璀璨的人生，
相信43歲的蘇永康會更懂得珍惜以後的每一個十年。
撰文：楊潔雯
人要面樹要皮，好多人會介意被直斥其非，尤其是藝人，他們要的面和皮絕對比一般人多，而且跟名氣成正比，越紅越要面。在中港台都有知名度的歌手蘇永康台灣藏毒被判勒戒轟動一時，臭事，可以不聞，最好不問，但是蘇永康卻歡迎查詢，本來想先試探一下：「你介唔介意？」他即刻心領神會：「我乜都得可以問，冇嘢唔問得！我係老臀部！」頭頂有烏鴉飛過，哦！原來他是「老屎忽」，欽敬！欽敬！並不是因為他是任問的「老屎忽」，他值得敬佩的，是一份坦承面對的勇氣！
勇敢面對挫折
兩岸三地文化不同，吸毒這些感敏話題，內地最好不說，台灣不需要刻意去說，香港人會說個不停，避無可避，所以毋須迴避，蘇永康說：「每一次圈內有朋友發生事，我都好似必須要發表一啲意見，有次我幽大家一默，蘇永康100歲唔死都應該要回應，其實一路以來解決問題嘅方法就係面對，你逃避啲乜？呢個係你嘅過去，你唔能夠抹咗你嘅過去，要承擔責任，就好自然咁面對。」
蘇永康的態度，可以是很多年輕人的借鏡，跌和痛是人生必經階段，最緊要是永不放棄，康仔說：「人最恐怖一件事係無方向，唔知自己想點，喺內地拍戲嗰幾年係我最嚴重嘅中年危機，成日諗自己嘅方向，當我醒覺自己唔甘心，我係鍾意唱歌，即刻又搵番個方向。」經一事長一智，蘇永康重拾自信，又得到恩師黃柏高指點迷津，很快重拾正軌，他說：「當我去台灣開騷時，已經好清楚自己要乜嘢，自己係想點，我唔會放棄唱歌，但我強調我唔討厭拍戲，事實內地拍戲真係搵到錢。」
開騷群星力撐
蘇永康因為「我不甘心」決志再戰樂壇，當年在台灣跌倒，他要在台灣站起來，07年台灣開復出個唱，結果喜出望外，再勇往直前可望收復失地，可惜行人止步，08年香港九展開個唱，反應冷淡。挾住去年BigFour人氣，今年11月再踏紅館舞台，9年沒有在香港紅館開個唱的蘇永康，不敢奢望，他說：「票房我唔覺得有壓力，我唔知蘇永康仲有冇機會喺紅館開騷，今次我當畀自己有個好好嘅回憶就夠。」在樂壇大家庭中，論資排輩蘇永康地位甚高，行內人稱「阿公」的就是他，如今阿公開騷，兄弟姊妹紛紛自動獻身，蘇永康說：「真係歡樂滿東華，嘉賓多到不得了，老中青都有，所以我揀歌都要好精準，要集合呢班嘉賓將佢哋發揮到最好。」
婚姻失敗的教訓
見過鬼會怕黑，蘇永康結過婚，怕再婚，可以理解，06年在陳奕迅婚禮上對現任女友Anita一見嗒糖，Anita有品味又夠時尚的黑色晚裝，令蘇永康眼前一亮，他直截了當，扮警察抄牌要電話，煲了一個月電話粥，然後提出結合方案，蘇永康說：「我好直接咁同佢講，因為我剛剛離婚，如果你好想結婚，不如唔好開始，做個朋友先，你唔介意就可以開始，咁佢又話得咪得囉！」
雙方要學包容
由一通電話開始，蘇永康試婚5年，跟女友一齊生活愉快，他相信今後繼續以現有方式相處和溝通，未來會是燦爛的，他說：「經過第一段婚姻經驗，我覺得兩夫婦要一條心，就等如一條路軌，一定要係單方向，攜手一齊行，好多事要傾，唔好擺喺個心。同埋有一樣嘢，唔好就，就唔到一世，係要互相接受對方缺點，要包容。夫婦最好唔好有秘密，呢個係我上一段婚姻嘅教訓。我家個facebook佢隨時可以開嚟睇，佢出trip我都會出去玩，不過我會報案先。」
第一次結婚觸礁，不等如一世都不想結婚，蘇永康仍相信婚姻制度：「唔好問我幾時再婚，呢個時候我唔再抗拒，但未有計劃，雖然霆鋒都離咗婚，喺我生命嚟講，婚姻制度係成立，適當時候出現啱嘅人，我覺得啱嘅人出現咗就係等適當嘅時候。」
祝福霆鋒栢芝
「離婚係新開始」，蘇永康為謝霆鋒和張栢芝的婚姻作結。作為過來人，比誰都看得更清，作為二人的知己好友，更加不忍心看到二人鬥到至死方休，蘇永康認為離婚對他們是一個解脫：「我覺得一段愛得咁轟烈嘅愛情，大家始終要試一次。不到黃河心不死，試一次，不幸地點知死咗，咁無悔啦！家共同撫養對仔，一天光晒。人生過得嗰一半，大把貨，咪由頭開始過，如果咁落去佢哋絕對可以做下一對拉姑同四哥。」
BigFour玩到60歲
自1993年組成「左麟右李」，譚詠麟和李克勤之後長做長有。2009年台灣實力派製作人李宗盛、周華健、張震嶽、羅大佑組成SuperBand，結果名利雙收，然後奇蹟再現，周華健歌唱事業再創新高峯。事實證明，40歲或以上的實力派歌手，如志同道合，都可以組組合，除了開演唱會做巡迴賺到笑，還可以提升個人名氣，2010年蘇永康、許志安、張衞健和梁漢文組成BigFour，成績有目共睹，事實是BigFour帶蘇永康重踏紅館，對他來說意義重大。
「傾咗十幾年」
原來BigFour這個組合的概念，早在96年安仔開演唱會時已經萌生，蘇永康說：「傾咗十幾年，以前好市，邊度有八國聯軍？舊年三間公司聯手先搞得成，呢種係集體回憶，黃子華都講過，我哋呢啲組合玩到60歲都仲得，不過家單飛吓先啦！」