新黑莓行OS7　上觸下篤　快感×2

玩咗咁多年，BlackBerry依然故我，堅守QWERTY鍵盤，好在佢都識得與時並進，最新嘅Bold9900，2.8吋芒改為輕觸設計，下方依舊搭實體鍵盤，「上觸下篤」相當就手靈活，搭埋最新OS7及1.2GHz處理器，上網足足快四成，用起上嚟真係快感倍升！

記者：陳國輝
攝影：蔡家輝

金屬包圍　激薄10.5mm

今次Bold9900繼續走行政人員路線，加埋招牌菜式QWERTY鍵盤，預咗個Look都無乜驚喜。值得一提，反而係硬淨又襟撞嘅全金屬包邊設計，如果你以為佢好重就大錯特錯，雖然機身物料更換咗，但9900仍僅重130g，拎上手甚為輕鬆。另一項令手感更舒適嘅元素係，機身厚度只有10.5mm，即使唔及索愛Ray咁玩激薄，但喺黑莓手機當中，已經係最纖薄嗰部；唯一可惜機背唔似以前玩皮革物料，改用鋼琴漆塗層感覺有少少齋。

■打側睇QWERTY鍵盤微微凸起，㩒落更就手。

■同時配QWERTY及TouchScreen，亦係黑莓第一次。

■又篤又㩒咁Magic，索性搵埋Harry哥哥表演魔術助興。

速度提升　上網快四成

外形硬淨，操作系統更升級為最新版BlackBerryOS7。如果齋睇介面，你我都未必知道有乜分別，不過廠方話瀏覽速度大幅提升，比以前快40%咁多，再加上呢部機採用已優化嘅LiquidGraphics圖像處理技術，睇YouTube甚至更順暢咁話。有無咁堅？小記現場玩咗一陣，上網瀏覽速度的確好順好爽，但播放串流影片仍間歇出現起格問題；至於TouchScreen操作手感，完全唔覺有Delay，只略嫌屏幕僅2.8吋，稍為細咗些小。