眾多大牌子相繼都推出晒Tablet，惟獨SONY一直無下文！你叫佢做「壓軸」亦無壞，因為到9月中旬旗下首部S系列正式推出；先推出嘅Wi-Fi版採用Android3.1，屏幕為9.4吋，全黑色機殼，話佢似GalaxyTab相信無人反對；值得留意反而係側邊上窄下闊嘅設計，音量、耳筒位、插卡放埋一齊，睇落似已摺起嘅Folder。
但更期待，我認為係摺得埋嘅雙芒P系列，兩個屏幕分別都係5.5吋，摺埋或揭開，感覺勁似老任NDS，但最特別嘅，都係佢支援「PlayStationCertified」，將本來遊戲手掣變身成輕觸式設計，打埋機都得。
腦龍亂入
由支援MP3、輕觸屏幕、體感遊戲到Tablet，SONY近十年都係慢人幾拍。今勻雖比iPad足足遲年半登場，不過機身外形、軟體功能頗具誠意，TabletS水滴形機側設計，起碼唔似一街倒模嘅Tablet；結合自家強大影音串流聯網，Store一開波就提供10,000首歌同6,000套戲，仲可運行PlayStation遊戲，難怪咁大膽機價比iPad更貴了。