雖然特首曾蔭權就快收工，但仍不忘創造就業大計益基層，噚日特首辦就出咗個招聘廣告，用$11,585呢個筍工價請「五級家務員」，簡單嚟講即係請清潔工，負責擔擔抬抬，清潔雲石地毯擺設、吸塵執房。如果獲聘者將來「升級」做四級家務員，就可以負責上菜同斟酒，人工有萬四蚊。查實八方覺得，煲呔應該喺入職條件一欄加埋「不可爛玩」嘅要求，唔係再爆出家務員帶朋友返去禮賓府BBQ嘅「家醜」就唔好啦！
除咗煲呔要請人之外，因為未來一年政壇有四場大型選舉，香港電台噚日亦登廣告，要用$13,000請「助理項目統籌」，但係合約只有11個月，擺明只做選舉。港台開列的要求唔低，申請人除咗要手持沙紙或者有專上學歷外，仲要有4至5年媒體相關工作經驗。人工仲低過四級家務員，好似唔係太吸引喎。