「Master」母帶，係每一間唱片公司嘅無價寶，因為佢係每一隻CD嘅亞當夏娃。而「1：1直刻母帶版CD」可以話係一種直接複製母帶嘅CD。雖然呢種CD閒閒哋貴普通CD幾倍甚至十幾倍，但製作人強調：「幾百蚊買到個Master返屋企，嗰份滿足感已經值回票價！」
記者：韓繼聰
攝影：伍慶泉
Model：CandyChong@InterplayWorkshop
查詢：風行唱片（27308880）
製作時間1：1
要了解1：1直刻CD，其實要由普通CD講起。每款CD其實都有佢自已最原本的總母帶，CD的製作就是從「總母帶」複製幾個「母帶」，再利用「母帶」製作印模（Stamper），才大量印製發行。而所謂的「1：1直刻母帶版CD」就是刪除印模、大量印製等工序，從母帶利用1：1的速度直刻出來。就是說，如果一隻CD長1小時，那麼直刻一隻CD便同樣需要一小時。「即使每日工作10小時，其實也只能製作7至8隻，單係人工已經好襟計。」風行唱片營業主任Ken說。
出世紙成本$300身份矜貴
要知道每印一隻直刻CD，母帶都會有一定程度的損耗，所以每個母帶能夠製作的直刻CD亦有限量，大概只能製作一千多隻，不能做太多。Ken指出，每隻CD都會擁有一張有獨立認證、獨立編號，有如出世紙的證書，以確保每隻直刻CD都有質量保證。唔好睇小呢張紙仔，以哥哥隻《Salute》為例，因為係從環球唱片的母帶刻製，所以會逐隻計錢，亦會逐隻出證書，單係張出世紙都要成$300一張，大可視之為一張License。
減少流失 追求零失真
一般CD工序多，大量製作，流失自然多，當然不能滿足音響發燒友。音響器材再貴，追求的都是減少失真，當然音樂來源本身的質量也同樣重要。由於直刻CD由母帶逐隻以1：1速度直接刻製，減少了工序，壓縮量大減，訊息流失量比一般CD少20%，還原度高，音質最接近原母帶，失真率極低，自然可以將原始錄音完美表現，為發燒友帶來最佳聽感。除此之外，直刻CD用上24K金CD-R製作，其密度較高，雜質較少，可有效提升光的反射率，加上通透光度較一般CD高，拾訊較清晰，誤差和失真自然較少。
講完造碟材料，當然要講CD最重要的「音色」。由於完全複製自母帶，所以直刻CD的音樂訊息非常充沛，純厚天然，聲響豐滿紮實有力。即時試聽，可以感受到音樂的高低延伸連貫自然，低頻速度迅猛有力，高頻水份充足，中段通透密度充足，層次清晰，立體豐厚。聽人聲時，音色爽朗悅耳，柔和通透亮麗，充滿活生感，現場氣氛濃郁逼真。再試聽樂器演奏，特別能感受到開闊現場感，每件樂器層次分明豐富，定位準確，能量感極充足！聽過你自然會明白。
資深樂評人 直刻推介
講咗咁多1：1直刻CD嘅特點同好處，發燒友係咪想即刻買番隻嚟聽吓？資深樂評人DavidLee就為我地簡單介紹咗幾隻直刻CD，話晒幾百蚊隻，都係聽吓書先穩陣。
《粉墨是夢》（$550）
天碟錄音師李小沛的得獎之作。David指，《粉墨是夢》動態表現非常出色，只有少數中國錄音可以做到外國天碟的錄音質素。欣賞時可以發現每一件中國樂器的分隔度、層次感、音色都好靚，就像在大型音樂廳中享受中樂表演。因為本身已是發燒碟，因此1：1直刻版自然更加靚聲！
《啼笑姻緣》童麗（$550）
童麗是非常出名的發燒碟歌手，聲聲甜美溫潤，中樂伴奏典雅優美，加上CD本身錄音有相當質素，音色表現柔和亮麗，是欣賞人聲不錯的選擇。
《鄧麗君15週年》鄧麗君（$750）
雖然本身並唔係發燒錄音，但鄧麗君的歌曲實在好聽、耐聽，音色亦相當不錯。加上《鄧麗君15週年》的選曲很「精」，非常具代表性，所以之前無論推出甚麼版本銷量都很好，1：1直刻版當然也不能錯過。
《Salute》張國榮（$750）
錄音質素極好，加上哥哥好少翻唱其他人嘅歌，仲要係首首經典，買嚟收藏都要。
《永遠是你的陳慧嫻》陳慧嫻（$750）
一首《千千闋歌》，已經係成隻CD的精粹所在。Intro一段清脆結他配樂，正好發揮直刻CD層次清晰、靚聲的優點。
《天空》王菲（$750）
低頻靚，動態出色，直刻CD啱晒，加上歌曲具音樂感，錄音有相當水準，是少有的高質素中文碟。
DavidLee對直刻的保留
身兼資深樂評人，及曾參與「1：1直刻母帶版CD」製作的雙重身份，David自然大有資格品評直刻CD。「絕不否認直刻CD比一般CD有着不能相比的高質素，但與HQCD等較高級CD差別卻不算太大，要記住最後出嚟都係CD！即是說礙於載體本身的關係，質素始終有一定限制。而且直刻CD製作量非常有限，價錢高昂，相信客路多為富豪級玩家，普及度應不大。」
