聽日36歲牛一嘅陳曉東（東東），雖然拍過唔少拖，仲成日同啲女星傳緋聞，但係東東都仲係吊兒郎當，一啲都唔心急成家立室，原來因為東東屋企有個開明媽咪，陳母唔單止唔催婚、仲搞笑到叫愛兒出家做和尚㖭。
日前東東同媽媽喺台灣接受「沈春華LifeShow」節目訪問，東東仲大講感情事，雖然已達適婚年齡，但保養得宜嘅佢絲毫唔擔心結婚問題，佢話：「要看緣份，自己不希望另一半是圈內人，因為同在一個圈子裏，感情很難維持。」東東自爆媽咪從來唔逼婚，仲鼓勵佢同細佬出家做和尚，不過陳母嘅意思係見到唔少出家人都幫社會做好多嘢，又可幫助大眾。
陳母後悔離婚
原來東東嘅媽媽喺佢15歲時同陳父離婚，陳母一直覺得自己做咗錯誤決定，令東東兩兄弟從小喺一個唔完整嘅家庭成長，佢仲眼泛淚光話：「我對他們兩兄弟很抱歉，媽媽對不起你們。」東東即體貼安慰媽媽，仲話因為有呢啲經歷先令佢可以堅強起嚟，面對自己嘅人生。
