脫髮係男人最大煩惱，搞得掂何止重拾雄風，簡直連自信都返晒嚟。將喺禮拜五為英格蘭出戰歐國盃外圍賽嘅曼聯前鋒朗尼，喺暑假花咗幾十萬織髮，M字額慢慢變番大草原，唔怪得佢忍唔住要無時無刻照鏡啦！
朗尼雖然得25歲，但就開始經歷男人最苦惱嘅甩頭髮。佢就話自己後生細仔已開始甩毛，一直大受壓力，於是的起心肝喺今個夏天用咗3萬鎊織髮，搞番掂個M字額。睇朗尼最新嘅相，條髮線果然推前咗，不過算唔算靚仔咗？我求大俠就唔敢下判斷，但係睇落就真係後生咗同精神咗。呢位紅魔前鋒話：「我真係多咗好多時間照鏡。對於開始脫髮嘅人嚟講，真係好大壓力，所以我同自己講，點解唔去將問題解決呢？」
揶揄C朗周圍女
朗尼亦強調，淨係會搞自己個頭，唔會好似前曼聯隊友基斯坦奴朗拿度（C朗）咁，走去脫毛同搽腳趾甲油。另外，佢仲話唔會因為自己靚仔咗，而好似C朗咁周圍女。朗尼笑住咁講：「我唔會好似C朗咁㗎！」朗尼織髮後成日照鏡，變到超姿整，連佢嘅曼聯兼國家隊隊友里奧費迪南都忍唔住寸佢：「我好期待喺操練之後，喺鏡度見到朗尼個靚仔樣囉！」
睇嚟頭髮真係帶到力量畀朗尼，事關朗尼喺今季英超超快上力，頭3場聯賽場場入波，仲入咗5球咁多。嚟緊聽晚到訪保加利亞踢歐洲國家盃外圍賽，朗尼肯定成為主隊後防心腹大患。賽前朗尼講到，好開心唔使同曼聯隊友貝碧托夫同場較量，因為呢位保加利亞射手舊年5月已宣佈退出國家隊：「站喺曼聯立場，我當然希望見到佢比賽。但對於英格蘭嚟講，貝碧唔打梗係好事啦。」
英格蘭現時喺歐國外G組同黑山一樣都係5戰得11分，爭緊首位，由於黑山同日訪4戰全敗嘅威爾斯，所以聽晚之戰對兩隊嚟講，絕對係非勝不可。