廖碧兒和李澤楷表弟林宗豪戀情告吹，嫁入豪門無望，近日又傳她成為無綫棄將，迫於無奈改投now兼要北上搵銀。前晚廖碧兒出席活動，她未有否認加盟now，問她會否怕無綫介意？廖碧兒冇有怕說：「我唔介意咪得。」
年初廖碧兒搭上李澤楷表弟林宗豪而狠飛舊愛陳豪，可惜戀情維持不久便告吹，廖碧兒嫁入豪門無望，唯有再靠自己搏殺，可惜近日又傳她成為無綫棄將，雙失之下廖碧兒只好投靠now兼且積極北上搵人仔。前晚廖碧兒返港到中環出席化妝品活動，她穿上大露背裙搶鏡，原來廖碧兒近日在內地拍清裝劇，故有機會即扮靚靚出席。
學普通話闖內地
近日有傳廖碧兒成無綫棄將，她只好加盟now，她聞言沒否認說：「我係簽咗經理人公司，遲啲會公佈工作方式，接受更多新工作同嘗試。」談到與無綫關係，廖碧兒聲稱沒問題，她認為因離開無綫才引起傳言，但會否擔心加盟now後無綫會介意甚至被封殺？廖碧兒冇有怕說：「我會專業咁工作，我唔介意咪得，總之一切盡力做。」
同時，廖碧兒亦積極北上搵銀，但近日內地限制港台藝人亮相綜藝節目，避免過份搶內地人飯碗，廖碧兒說：「唔係好怕，中國人嘅影響力一直擴張，相信佢哋唔會太局限中國人。」她透露會學好普通話，以便在內地發展。
溫碧霞盼仔獨立
同場的溫碧霞透露，其養子今日開學上幼兒班，不過她要返內地工作，故沒時間陪伴，但她早已為囝囝準備好一切，她謂：「唔喺佢身邊有好有唔好，可以令佢冇咁依賴我。」另一嘉賓羽翹表示，稍後將與周秀娜合作拍電影《紫荊俠》。
採訪：卓寶花 攝影：黃文偉