【本報訊】曾經「迷失十年」的佐丹奴（709），繼去年走出低谷之後，昨日再下一城，交出一份遠超市場預期的中期業績，純利勁升71%至3.46億元，而券商普遍只估升30%至40%。消息刺激佐丹奴股價午後爆升18%，分析員相信今日各大行都要全面調高盈利預測，相信佐丹奴今年要再創盈利高峯是「無難度」。 記者：吳綺慧
佐丹奴連續兩次交出令人驚喜的業績，公司最近先肯「出山」，一改過去多年都留在總部長沙灣見投資者的作風，在中環租場接待各位。「業績好先搬出嚟搞啦，你估租場唔使錢？」
純利增71% 股價飆18%
主席兼行政總裁劉國權昨日心情大靚，不斷強調公司能走出谷底「並無絕世武林秘笈」，純粹夠勤力，做好存貨同供應鏈管理：「佐丹奴係一隻青蛙（公司原本的logo），入水能游，出水能跳，無水仲可以爬樹，要適應個市場去做嘢就OK啦！」
劉國權強調，佐丹奴近年提升產銷組合方面效果不俗：「我哋已經少賣咗普通所謂嘅『圓領仔』T恤，做多啲潮流嘢，好似和古巨基及詹瑞文合作的Tee，就好受歡迎。我哋已經做到大家想買嘅嘢。」
佐丹奴上半年收入上升24%至26.49億元，雖較第一季時的26%略有放緩，但毛利率及經營溢利率均大升1.8及4.4個百分點，進一步升至59.7%及17.1%水平，帶動盈利有驚人增長。佔公司整體收入最大的內地市場，期內銷售升21%，同店增長9%，較首季時明顯放緩。但香港及其他亞洲地區的表現就遠超預期，其中香港零售額增24%，同店銷售高達17%。佐丹奴中期多賺71%，帶動股價爆升18%。
劉國權透露，7、8月份公司整體收入仍維持高雙位數增長，不過下半年要達今次盈利升70%可能性就不大。「我們在第一季擁有一個『完美嘅冬天』，天氣夠凍，厚衫特別好賣。加上銅鑼灣間大舖8月已經結束營業，嗰度銷售都有2%至3%影響。」
今年開店數目難達標
劉國權同意，內地由於打壓樓價措施已經到位，打擊到市民的消費意欲，5月開始銷售明顯放慢，公司亦調低了內地的開店數目，全年未必可達原本的目標300間。「我哋會先集中在提升平均單價，可能短期會犧牲一下銷量，但等到品牌嘅pricingpower夠強，到時再刺激銷量都未遲。」