英超富豪球會曼城陣中粒粒星，好似迪斯高、阿古路同泰維斯咁，個個身價都過億港元，但令人意外嘅係，呢班球星一啲架子都冇，仲鬼死咁親民；早排仲搞鬼串演「醉爆伴郎團」，親身祝賀一對本身係曼城球迷嘅新人。
賽前撞正球迷結婚
話說上周日，曼城喺第2輪英超鬥保頓前，佢哋住喺曼市嘅WorsleyMarriott酒店，咁啱曼城粉絲基斯同莎蓮喺度結婚，於是曼城班球星就做個順水人情，親自向呢對新人送上祝福。無端端有成班曼城球星嚟參加自己婚禮，梗係開心過中六合彩啦！
24歲嘅莎蓮話：「我哋兩個都係曼城球迷，所以亦搞咗個以曼城為主題嘅婚禮。班伴娘同班伴郎就分別着天藍色裙同打天藍色呔。不過，我哋就冇諗過曼城成隊波都住喺度囉！」
莎蓮仲話：「我哋行完禮同食完嘢之後就落大堂迎賓，突然見到泰維斯喺眼前出現。我忍唔住大叫『卡路士，卡路士呀！』我知佢唔識英文，於是指住基斯件天藍色禮服，然後話『結婚相？』泰維斯笑住咁答我話可以，於是我哋就一齊影相。」
曼城每日使過千萬
除咗泰仔外，莎蓮同佢老公基斯仲有同高拉洛夫、迪斯高同史提芬沙域合照㖭！莎蓮繼續話：「佢哋都係巨星，但就平易近人，一啲架子都冇。有賓客問我哋係咪夾定，但我可以好肯定冇，事前根本唔知佢哋會嚟。」
曼城球員出席完婚禮後就贏保頓3:2，之後再作客大炒熱刺5:1，英超開季3戰全勝，唔知係咪基斯同莎蓮帶咗啲旺氣畀佢哋呢？話時話，據英國傳媒報道，曼城自從喺08年獲油王入主「升呢」做富豪球會後，3年豪使10億鎊，平均日花91.5萬鎊（約1,162萬港元）；但喺3年前嘅前泰國總理他信統領年代就窮到燶，要籌旗645萬鎊先至買到薩巴列達，名副其實飛上枝頭變鳳凰。