棒下出孝子？港聞版都有得睇，倫常慘劇刀光劍影，用心棒下仍出小學雞。鏡頭一轉，美國熱血教師RonClark以55條做人道理將曳學生教成材。55條，真係Work？陶傑、陳雲、陳也，兩個撐一個唔撐，就趁9.1開學日來個定奪。
記者：朱崇德
攝影：譚盈傑
Model：Hailey@GME、Risley
RonClark係乜水？
美國熱血教師，一次又一次將弱勢社群學生教成品學兼優全國知名，連美國總統都接見佢，電影公司更將其故事拍成電影。佢以從小由祖母教導嘅55條做人規矩寫成《TheEssential55》一書，教條包括小禮儀及人生小道理，成教育界經典。
陶傑：唔聽教，打！
「港孩真係出咗問題！以前啲小朋友住木屋、捱窮，要開車門、擦鞋幫補家計，家父母有啲錢就變得百般呵護，過多幾十年，呢班無心理品質同承受力嘅港孩接棒做政府高官，到時撞正地震海嘯恐怖襲擊，香港玩完！美國、日本都好富裕，美國出兵阿富汗，仗一樣可以打；日本地震海嘯，嗰種紀律性、堅忍力極強；但香港唔得，歸根就係香港父母無知！中國人天生封閉又恐懼，露營驚細路俾蚊咬，爬山又驚跌親，樣樣都從壞處想，加埋有兩個錢，要補償番自己捱窮嘅日子，將啲小朋友俾菲傭照顧到九歲都唔識綁鞋帶，再加埋近十年『親子』呢個名詞害死人，香港啲七、八十後父母以為親子就係錫，而錫就係俾好多物質佢哋，寵壞晒。
55條好適合香港小孩，人哋歐美社會一樣富裕，但照樣培養到人才，呢個就係原因。建立自信嗰幾條一定要學！中國社會小孩天生無自信，一問三不知，老師上堂問問題無人敢舉手，55條教到啲鬼仔好Aggressive（進取），細細個已好有自信、有CriticalMind（批判性），中國式教育絕對做唔到，只會教出一個畸形民族。
55條值得參考，唔聽教就恢復體罰，打佢啦，要軟硬兼施。家啲七、八十後父母，淨係識睇八卦雜誌，點解唔睇多啲兒童心理學書？父母生嚟唔教，咁生嚟把鬼！其實港孩問題就係父母嘅問題，唔應該推諉到學校教育，學校一班有幾十人，但父母係兩個對一個，你話邊個責任大？同埋唔好咁輕易帶啲小朋友去旅行，要佢成績好又聽話先有得去，有啲港孩十二歲已經行勻全世界，佢對人生仲有乜嘢期待？」
陳雲：小朋友曳，要攬！
「香港大家族式家庭唔見晒，無阿爺阿嫲呢類老一輩去教，父母又出晒去做嘢，小朋友無人教，加上以為有錢，一切可以補償番，因而越縱越壞！55條呢類家教，中國以前都有，例如《弟子規》，佢可以話係現代版家規，佢幫小朋友學識確立自信，而唔係教你要尊敬邊個邊個，喺人人平等嘅原則下，佢教你邊個值得尊敬，感覺有啲似人生格言，當中『不管情況如何，一定要誠實』、『在你能力範圍內，做最好、最好的人』、『別讓將來有遺憾』，都係值得港孩借鑒嘅人生格言，家長亦值得跟住去教小朋友！其實呢啲係好古老嘅美國規條，建基於人人平等，幫小朋友確立個人尊嚴，實行起嚟會有啲困難，但都要一定做，香港小朋友好耐無被人管教，變成好多人都對佢哋無要求，所以更需要規條。喺教嘅過程，難免會有反抗，我嘅做法，係要佢哋靜落嚟，我會攬住佢，唔好俾佢焦躁，佢哋靜落嚟先會諗吓所作所為對或錯，出咗咩問題。」
陳也：識講2,500個笑話好過！
「好彩55條係美國貨！港孩有乜唔好？同大陸孩比，港孩已經相當唔錯，我哋嘅小朋友自由度高，思想亦好自由，55條同23條一樣，都係一種約束！媽媽唔係警務處長亦唔係特首，做番自己應該要做嘅嘢已經夠，有啲爸媽一時做教師又教英文又教法文，家仲話55條，做乜先？其實身教先最重要，唔好賴學校或者教育制度，睇番自己點做人，個小朋友都係學你。最近好多人追捧識2,500個英文嘅小孩，如果你問我，我寧願個仔識講2,500個笑話，因為佢將會成為年紀最輕嘅棟篤笑演員，咁我就發達啦，唔好為教而教，順住小朋友性格自由發展啦！」
