「公主」一向鍾意出風頭，最近佢同「花弗」拍拖哄動全城，真係完全合晒公主心意。原來，公主家姐「煎pan」一早同公主傾好，叫佢出席自己有份搞嘅大型公開活動，諗住呢次係公主公開拍拖之後第一次見傳媒，一定夠晒噱頭，點知突然殺出個程咬金「紙包蛋糕」，佢搶先以8萬蚊出騷費請公主出席另一個公開活動，雖然公主唔恨錢，但因為佢心急曝光出風頭，所以應承咗紙包蛋糕出騷。煎pan俾人搶咗頭啖湯，自然激到生蝦咁跳，尤其是唔高興公主手指拗出唔拗入。公主知道衰咗，於是諗方法冧番煎pan，就係喺煎pan搞嘅活動，同花弗首次一齊亮相，就係咁，煎pan先至順番條氣。
撰文：關仁