BlueElephant（或譯做金象），有著名泰國女廚師Nooror坐鎮，佢以前在孟買TajHotel、東京希爾頓酒店示範泰國菜廚藝，設計菜單，饒有心思，分「昨日、今日、明日」三大類，我地於是各叫兩三款，有人飲冬蔭功（蝦），與「冬卡雞」（雞），以後者更為鮮甜美味，主菜以拉瑪五世皇之心頭好ForgottenCurry食譜（recipe）複製，一吃難忘，其他靚菜式，不能盡錄，正是眼闊肚窄，點可以逐一品嚐呀，還要錫住個荷包呢。呢間餐廳在日間開授泰式廚藝班，聽講有不少遊客專程來此上課，香港之閨秀廚師，最啱來此學番一兩招。沙塘路上有著名酒店如SukhothaiWestin、BanyanTree等與BlueElephant「金象」頂多只有一兩公里之遙，其中Sukhothai別有特色，由香港興業集團擁有，左丁山以前住過，好正。香港限於地皮面積細小，好難興建如此庭園式酒店。
吃過美味泰餐，因此處離河邊不遠，立即叫的士去到河邊香格里拉，順便取回日間遺失之NaraiPhand皮帶，香格里拉酒店服務殷勤週到，值得一讚。
次日要吃四季酒店之SundayBrunch，乃此行重頭戲，知道任飲任食而食物太多，於是一早起床，放棄包在房租內之自助早餐，行出酒店轉左直往曼谷市中心最大公園LumpiniPark，行到入去環繞人工湖兜圈，星期日早上，不少洋人、泰國人在此公園跑步，打太極，左丁山一味快步行，行足五十分鐘，全身濕透，先至返回酒店，冲個凍水浴，以最佳、最餓狀態落去食早午餐，對住啲美妙美麗麪包，捨棄之，一開波就食魚生、鵝肝、魚子醬、龍蝦、帶子、鮮蝦、飲香檳、白酒、蘋果雞尾酒。衝刺一輪之後，就要打拉布，唞一輪才食日式牛肉火鍋、燒鰻魚、燒牛肉、燒羊架等，配以紅酒，食到直情坐咗響度，唔識郁。學生H兩兄弟勝在年青力壯，大吃特吃，跟住失了蹤影，原來因為食得太飽，走咗上房間玩電腦，小休半小時後又落嚟食過，學生H話：「好彩醒目，今朝唔食早餐啫，否則劣幣驅逐良幣。」唉吔，四季酒店之早餐，點叫得做劣幣，不過一個人一個胃，唔裝得太多食物嘅，Brunch每位收費（包埋加一）計番係七百八十港元一位，夠晒抵，個個禮拜日滿座㗎！