周柏豪同趙增熹噚日去咗大埔亞視總廠，接受黎燕珊同馮家俊主持嘅《Eva會客室》訪問。早前柏豪情敵陳山聰同女友何超雲高調同賭王何鴻燊食飯，仲上載合照到微博，柏豪話有留意，但係唔想回應太多，以免自己辛苦受壓力，柏豪話自己低調，同時又係傳統男人，佢話都希望成家立室，仲要係自己搵錢老婆可以唔使做，言語間好似有所暗示喎。