離開湄南河畔之香格里拉，便往熱鬧之商場，以前係素坤逸路之Emporium（盤谷銀行陳家擁有），現在就係SiamParagon（本係皇太后資產，去世後由詩琳通公主承繼），呢個商場夠晒現代化，吸引最多人流，帶旺埋商場後面之較新酒店Kempinski，由酒店行往商場，過一條馬路就到。不少香港阿太阿姐到曼谷渡周末，就喜歡住在這裏，外國遊客亦然。商場對面之「沙炎廣場」（SiamSquare）（朱拉隆功大學擁有）本是大學生集中地，記得有六條街，三間大戲院Lido、Scala及Siam皆是最現代化之大戲院，左丁山曾留下不少腳毛，呢次去到沙炎高架車站，望過去，整個沙炎廣場已夷為平地，成為一塊大地皮，將來如何發展，相信朱拉隆功大學自有一套，將來收租收到笑。
行下行下，發覺自己好似少咗一個袋，於是問老婆：「我個NaraiPhand袋係唔係你拎住？」一問之下，方才發覺不見了，不知遺留在那裏，急忙打電話去香格里拉細說情況，希望係漏咗喺香格里拉，先至有希望搵番，兩個鐘頭之後，香格里拉來電，已經在河邊搵到，左丁山急忙在晚飯之後，飛的去酒店領回。
晚飯在何方？就是在Sathorn路之「藍象」（BlueElephant）。沙塘路幾十年前是九龍塘式住宅區，十分清靜，到處是兩層高花園洋房，而今已改變為玻璃幕牆大廈銀行商業區，與中環相近，但在芸芸高樓大廈之中，有一間古老大屋，三層高，已有一百餘年歷史，初時為孟買百貨公司，後為日本皇軍總部，戰後成為泰國中華總商會物業，商會後來將物業申請註冊為古文物建築，永遠保留，又搵咗BlueElephantCookingSchool&Restaurant進駐，於是大屋搖身一變，成為優雅泰國菜餐廳，晚晚客似雲來。我地坐的士去，曾遇上塞車一陣子，司機居然口出怨言：「BlueElephant好高級好貴嘅噃，你地有冇訂位㗎，嗰度晚晚滿座，你地冇訂位就唔好去啦！」都費事睬呢位多口司機，冇訂位，走去浪費時間乎！其實塞咗一陣就到，哎吔，笨咗，餐廳對面馬路就係高架車Surasak站！搭高車好易到。