大美人李嘉欣有仔萬事足，昨日在灣仔出席首飾活動時如常地大談心肝椗Jayden的趣事，大爆自己憶子成狂見頭暈。嘉欣又揚言留定鑽飾給Jayden老婆仔，奈何小Jayden愛父親亨亨多一點，牙牙學語未懂叫媽咪，只對住母親叫「鴉烏」，真頂心杉兼唔識貨。
大美人李嘉欣昨日現身灣仔君悅酒店，出席Forevermark鑽飾活動，大會特別訂製了一幅普普風格嘉欣四格肖像油畫，給她作禮物，同場女模AliceB.及MelanieZ.示範。嘉欣自年頭生下心肝椗小Jayden，每逢現身活動都大談湊仔經，她在台上預言會留定鑽飾給Jayden的未來老婆，她說：「自己都有留，老公都有講。」
老公開解番
問到會否另外預留給女兒，嘉欣說：「冇計劃，冇乜特別恨，湊一個BB唔簡單，一出世已經唔簡單，好勞心，每時每刻都會彈起身想見到佢，有時衝得太快會見暈，生仔係一件事，養佢教佢係超級大件事。」
問到六個月大的小Jayden開始識叫父母沒有，嘉欣說：「未識，我每次錫佢，佢都會發出『鴉烏』咁嘅聲，我同佢講唔可以叫媽咪係鴉烏，不過佢好錫爹哋，好受佢，唔使做乜已經好受。」嘉欣透露亨亨有開解她：「佢同我講好愛我，你好愛BB，BB愛我，咪『戥』番勻。」記者取笑她條氣唔順，她亦笑言：「唔順，我想全世界一個人愛我，愛個仔地位高過老公，唔需要掩飾。」
採訪：盧妹
攝影：黃文偉
