許志安前晚在紅館舉行尾場騷，女友鄭秀文（Sammi）身在北京未有捧場，但安仔也甜爆透露大前晚女友從澳門趕回港撐場。前晚張衞健逼問安仔，若自己與Sammi跌落海會救邊個，搞到安仔勁尷尬，事後重色輕友的安仔直言：「我梗係唔會救佢。」
許志安一連兩場「SummerPOP2011」紅館演唱會前晚尾場，內容跟5月安仔的25周年個唱相近，中間加插向張國榮致敬部份。前晚嘉賓有葉德嫻、Big4拍檔梁漢文、張衞健及蘇永康等。
歌迷錫面狂扯
安仔前晚兩度安哥及感動落淚，握手環節時又任由fans錫面及狂扯。整晚個唱全場fans多次大嗌Sammi，Big4三子出場歌迷特別興奮，張衞健抵死說：「我祝安仔身體健康先有力拍拖，先可以拉埋天窗，先可以將冰山劈開。」安仔感激張衞健撐場說真的很愛他，張衞健即說：「咁你愛我多啲定愛Sammi多啲，我同Sammi跌落海救邊個先，唔好話我，做朋友呢啲問題一定要問，Sammi可以同你生仔，但我冇辦法。」全場起哄，安仔只好掉頭走，其後四子合唱及落台握手掀起高潮。
拒答驗身問題
安仔接受訪問時，被問會救誰？他即說：「張衞健儍儍哋，呢個問題太矛盾，我梗係唔會救佢。」有指大前晚Sammi在澳門做完騷即撲返港撐愛郎，安仔坦言事前不知女友會來，問他是否很sweet？他冧爆說：「都係種鼓勵。」會怎樣報答女友？他稱隨遇而安，搵日出去食飯。提到Sammi質疑安仔當年白泳褲裝假狗及要檢查安仔雄風，安仔說：「佢冇理由講呢啲，話墊咪墊囉，冇所謂。」問他被Sammi檢查過未？他即說：「嘩，呢個問題太大膽。」此外，Sammi最近擔任鞋履品牌Skechers亞洲區代言人，拍攝新一輯平面廣告，展現完美運動線條。
採訪：溫敏芝 攝影：仇志德
