重口味紅皮椅　火辣埋身

無論是邊類型男人，體內總潛藏貪新鮮愛刺激的DNA，一行差踏錯，隨時惹上孽緣；如果將呢類DNA投放在「二奶」身上，唔止自己開心，屋企人一樣享受得到。呢個「二奶」當然唔係女人，而係男人部愛驅。呢部重口味火辣版Mazda5，身處其中，完全感受到火辣味撲住埋身。

記者：趙慧敏
攝影：蔡家輝
Model：Betrys@GME

皮料舒適可襯色

七人車永遠被定性為保守，不過時代話畀你知，住家男人偶然都想試吓不羈，即使車款唔轉，一樣可以玩出火辣味！最近Mazda為旗下七人車Mazda5改變形象，推出RedPassion版，車櫳座椅全換上充滿歐陸古典味的真皮格仔圖案及紅撞黑TwoTone色調，效果貴氣搶眼。雖然工序全部是MadeinHK，不過皮料摸上手柔軟舒適，座椅縫製手工亦不俗，坐上去，承托舒適自然，最緊要是皮料不會變形起皺褶，絕對唔係山寨貨。不過代理都考慮到唔係個個廿四孝爸爸都適合呢啲重口味，如果嫌鮮紅太過刺激，黑底紅線或灰底紅線，甚至全黑全灰一樣任你襯，要乜獨特口味都滿足到你。

■雖然工序全部係香港製造，不過皮料縫製手工不俗，沒半點山寨味。

■皮料有多個款式選擇，任你襯到絕。

同級最大電趟門

車櫳既然夠搶眼，都要滿足一家大細要求，擁有同級最寬686mm開啟寬度最大的電趟門，加上防夾功能，屋企人上落車就更加輕鬆自在，仲有齊6.5吋輕觸式屏幕音響系統及後泊車鏡頭顯示屏，加上中排頂置8吋LED顯示屏連DVD，塞車都唔怕悶親屋企人。
屋企人要享受，司機一樣可以享受，配置2公升引擎，最高輸出144匹馬力，老實講，車廂坐足七人無疑係「插翼難飛」，如果載客少咗，再用上5前速+/-Activematic半自動波，唔單止發現佢豪邁的一面，且轉檔反應乾淨利落，駕駛樂趣都不錯呢！