現年26歲的中德混血女模傅嘉莉，論人氣、論外貌不算是最厲害和最標致，但入行五年已經由新界區搬到香港區，由香港走到泰國、日本，小妮子目標明確瞓身進取，現階段謝絕感情只談工作，為的就是一個夢。
傅嘉莉這個名字，從來不是香港娛樂圈或者模特兒界最活躍的頭幾位，她入行五年，卻已經在所屬的模特兒公司Elite當選過三次TheBestPerformance模特兒，她前日接受訪問時說：「其實嗰種感覺真係唔識點去形容，我只可以講所有嘢唔係單憑我自己就可以做到，公司同顧客都好錫我、幫我好多。」
日本拍廣告
的確，上天對傅嘉莉頗為眷顧，2009年入行三年的她便有機會到不少人爭住去的日本工作，當時日文只是有限公司的傅嘉莉，幸運地在當地拍攝電視廣告：「我記得試鏡時要試戲，我日文又唔叻，真係好擔心，最後竟然揀咗我，仲做足一年，真係好難忘。」
談到在日本的工作經歷，傅嘉莉坦言驚喜無限，除了十多個硬照廣告，還有商場代言，最令她興奮是在當地行騷：「我唔係高，適合做廣告模特兒，喺日本行騷完全係意料之外。」
愛情向後移
談到夢，傅嘉莉直言當模特兒是她的夢：「我升中六時無意中入咗呢行，當時嘅心態已經偏向工作，而且我會抽好多時間去學嘢充實自己，完全冇時間同朋友去hangout，有時我都會問自己會唔會損失咗，但諗番自己得到嘅，就覺得都係值得，家人大咗，學識分配時間，就會陪多啲屋企人同朋友，愛情我反而放得好後。」
傅嘉莉謂現階段只談工作不談情，雖然有時看到朋友與情人過得甜蜜，但是工作上的成就，令她更滿足：「我有個細我12年嘅細佬，所以朋友話憧憬結婚、生BB，我覺得湊仔我試過啦，反而工作成果令我更加有動力，如果仲要我顧住身邊人嘅感受，家諗起都煩。既然投入唔到，就唔想打擾人哋囉。」
計劃做生意
暫時擱置投資感情，但真正的投資，傅嘉莉非常有興趣，她透露向來有買樓，五年來已經細屋搬大屋，由新界區搬到港島區：「家儲咗少少錢，計劃用六位數字投資生意，我唔會放棄模特兒工作，因為我真係好鍾意做呢行，好似拍戲、拍劇，我都好有興趣。」
平日傅嘉莉仍然不斷增值自己，跳舞、樂器、陶瓷還有學日文，下月又要到日本工作，問她還要衝刺多少年？她笑言：「做得幾耐就幾耐，做唔到就搵個人嫁！」
教阿媽玩MSN
外柔內剛的傅嘉莉，為了工作經常日夜顛倒、四圍飛，她說：「其實屋企人由我入行擔心到家，佢哋唔熟呢行運作，就算我遇到問題、唔開心，都唔知道可以點幫我解決，我理解佢哋嘅擔心，因為好多嘢真係唔穩定。」
傅嘉莉透露媽媽最緊張她的身體：「媽媽話睇到我越來越瘦，又成日唔知我飛咗去邊，所以我喺香港都盡量每星期同屋企人食飯，同埋我會每日keep住同媽媽通電話，家媽媽仲學識咗用Skype同MSN，咁就可以成日都傾偈，等佢唔使咁擔心。」
Profile
英文名：KellyFu
國籍：中德混血兒
年齡：26歲
三圍：33B、24、34
身高：170cm
曾拍攝廣告：H2O代言人、Rejoice洗頭水廣告、陽光檸檬茶
曾拍攝電影：《無間道II》、《校墓處》、《索命童話》、《人約離婚後》
採訪：盧妹
攝影：林德雄
化妝：EmilyNgai
髮型：DicksonofChin.G