上個禮拜濟南嘅恒隆廣場開幕，除咗董事長陳啟宗風騷之外，全程naturalhigh嘅仲有董事總經理陳南祿（洋名菲臘）。佢見到班香港記者，就不斷搞爛gag、鬥嘴講笑，講到唔夠講，仲連自己同事俾人搞大個肚都爆埋出嚟！
話說恒隆廣場開幕慶祝夜宴，席間菲臘陳過枱到香港傳媒嗰一圍，仲突然爆咗句，「負責濟南恒隆廣場嘅同事Christine，就係因為呢個project俾人搞大咗個肚！」菲臘陳仲專登走去捉事件主角、腹大便便嘅Christine過嚟。
原來呢個係美麗嘅愛情故事，Christine當年被派做開荒牛，喺濟南負責恒隆廣場興建，其間邂逅年輕有型建築設計師，結果咪就係有情人終成眷屬，兼有埋愛情結晶品囉！
世界小姐高過佢唔順氣
令菲臘陳high爆嘅又點止香港傳媒。話說開幕式請咗世界小姐張梓琳，同奧運自由泳比賽金牌得主莊泳做嘉賓。菲臘陳向來都高人一等，點知張梓琳仲要高佢半個頭，佢仲話，「佢着高踭鞋，我冇高踭鞋着，頭髮又少唔能夠梳高啲！」
既然「輸」得咁唔順氣，華華問菲臘陳，「咁你有冇問張梓琳，『邊個請你嚟㗎』？」菲臘陳語塞咗數秒之後話，「係喎，唔記得咗問㖭！」
李華華
mailto:[email protected]