距離9．3港甲開鑼唔夠一個禮拜，我求大俠身邊唔少朋友，茶餘飯後都會講吓本地波，揭幕戰由「港版巴塞」傑志對重組後戰鬥力大增嘅晨曦，戲碼相當唔錯。講開戰鬥力，呢期最hit嘅港甲人物，一定係通街都見到佢賣標榜用家戰鬥力UP嘅安全套廣告，港菁守將曾至孝！
曾至孝被封戰神
安全套最緊要就係安全，同打後防一樣，守好最後一道防線。阿孝身為港菁最有經驗嘅鐵衞之一，拍呢個廣告勝任有餘。帶啲日本人feel嘅阿孝一身打拳look，赤膊上陣緊守兩點不露嘅廣告相，佈滿巴士同港鐵兩邊扶手電梯，惹人注目。佢班港甲老死同一班粉絲更唔話得，將佢嘅「傑作」喺討論區瘋傳，更藉住domdom「戰鬪力UP」嘅宣傳口號，封埋阿孝做「戰神」。
俾班老死咁玩，不嬲都有做開part-time模特兒嘅阿孝大方話冇所謂︰「之前踢完大中收『咧』放假後冇嘢做去casting（試鏡），點知一試就話OK，拍咗4、5個鐘，都有4位數字酬勞。其實都冇尷尬，呢個算係拍咁多廣告之中最難忘。」至於嚟緊又拍八達通電視廣告嘅阿孝，俾口痕友問有冇一世domdom贊助，佢就笑晒口話︰「有就好喇！」
傑志3星sell鬚刨
阿孝率先跑出，去屆盟主傑志都唔弱，俾廣告公司睇中，搵咗香港足球先生盧比度、盧均宜同助教鄭兆聰crossover陳奐仁，拍一系列廣告sell鬚刨。據講傑志有7將試鏡，最後就揀咗以上3位，拍咗7個鐘，收6位數酬勞。盧比度喺廣告仲講廣東話，夠台型。呢輯廣告暫時只喺網上及fb有得睇，周五就有記招講詳情，仲有新一輯廣告出街㖭。刀片對domdom，睇嚟傑志贏一仗先噃。
