上市公司通告千奇百趣，華華噚日又睇到份令人「O嘴」嘅關連交易。事緣天津創業環保（1065）簽訂協議，將公司16名員工借畀母公司天津城投，由上星期四起借到12月30號。雖然話借大概4個月，但人工要成492萬港紙，仲要由阿仔畀！貼錢送人畀阿媽用，呢個仔真係孝順。
華華計一計數，呢班人每個月要出成123萬糧，即係月薪平均7.7萬。呢個數真係令華華嘅羨慕，又妒忌。份通告話，呢班人係「專注技術諮詢及污水處理設施管理的工程及管理員工」，難怪咁值錢。
不過，最搞笑嘅係，公司強調「借出僱員並不會影響本公司的運營」，仲可以「充份利用人力資源及為本公司帶來收入」。咁講法，莫非係曲線寸緊呢班人係冗員，可有可無，貼錢外借反而可人盡其才，幫公司搵錢？