中視金橋（623）有靚爆鏡嘅業績，銀彈又勁多，有番咁上下防守力，要。中視金橋呢期啱啱公佈本年上半年度（6月底止）業績，純利一支箭飆升咗1.8倍到7270萬銀人仔，靚仔到痹。要咁睇，中視金橋係央視承包資源廣告經營代理權最大嘅營運商之一，已經有絕佳優勢。又睇番CTR研究預測，2009年到2011年，選擇增加廣告投入嘅廣告客戶比例分別係51%、66%及73%。廣告客戶投放熱情，有增無減，照睇，中視金橋全年度純利，繼續肥仔水。而集團今年純利係咁意翻半番到2.37億銀人仔，PE得番5倍。再講中視金橋手頭淨現金達9.5億銀，銀彈多，加強跌市防守力。買中視金橋，擺中線，博破頂翻半番到3.90元，PE仲係7字頭單位數。
保華建業折讓仍大
保華建業（577）啱啱上星期公佈，夥拍呢期紅透嘅Legendary及祖國華誼兄弟（深：300027），進運國際電影業。呢壇爆炸性消息，加埋街貨得2億股，斷估唔會一兩日貨仔。又保華建業未計配股派送前NAV約莫1蚊，現價（0.91元）仲係有折讓。趁上日調整，入市短打博升20%到1.10元，P/B先啱啱1倍多少少。
錢雋