市況沉悶，魏力上網周圍望吓iPhone5的消息，唔少網友對其設計揣測多多，但整體認為將更薄、更輕、更快。其實iPhone4已經好薄，再薄啲邊夠位裝零件？有IT達人同魏力講，iPhone5會大量採用雲端運算技術，將本來儲於機內的多媒體資料放喺「嚿雲」度，到時機身零件少咗，部機就可以薄啲。
講咗咁耐，同投資有咩關係？雲端運算越普及，數據中心的需求就越大，網絡質素的要求亦會更高，相關股份的投資潛力不容忽視。中信電訊（1883）食正呢個趨勢，加埋中信集團支持，優質資產源源不絕注入，中期業績省鏡，上周五發力爆升11%，收1.70元，突破月中反彈高位，兼抽穿下降軌，現價買入先睇2蚊，博升18%。
集團上半年純利2.34億元，按年增30%，每股盈利9.8仙，預測PE8倍左右；中期息2.4仙，股息率5.6厘，相當吸引。集團知名度高，剛舉行的深圳大運會，及去年的世博和廣州亞運會亦由集團提供通訊服務，足見其質素之高，並建立廣泛知名度，有助開拓海外市場，令生意做大做強。
魏力