車仔新帥波亞斯（右）俾人話係「摩連奴二世」，今季英超打咗3輪，佢終於有啲摩佬風範嘞！話說前晚車仔3:1贏諾域治場英超，波亞斯俾諾域治領隊林拔投訴佢旗下有個教練踩過界，走咗過佢嗰邊後備席，林拔仲話咁做好唔尊重佢哋，但波亞斯一於少理，而且好寸嘴咁話只係佢哋職員太過投入，先至唔覺意走錯入諾域治後備席。波亞斯開始摩佬上身，睇嚟以臭口見稱嘅曼聯領隊費格遜同埋阿仙奴領隊雲格，要做好準備至得嘞！另外，喺嗰場波俾對手門將魯迪打中個頭搞到口鼻出血嘅車仔前鋒杜奧巴，事後證實只係輕微腦震盪之後，再進行腦掃描確定傷勢。我求大俠希望佢早日好番，返球場為車仔搏殺啦！