賽前，領隊費格遜爆粗鬧英格蘭足總，話足總針對曼聯，當佢哋「狗屁不如」。事緣係英格蘭國家隊領隊卡比路即將點兵出戰歐國外，曼聯有8名球員好大機會入選，差唔多係紅魔半隊主力，影響球會兵力。其實，爵爺都係借題發揮啫，佢同足總嘅恩怨積積埋埋成本電話簿咁厚，呢次乘機發難，總好過老人家鬱住鬱住啦。