一行六人，前星期五在曼谷著名意大利餐廳Zanotti食餐，當然感覺良好，非常愉快，與香港意大利餐廳比較，可以套用一句古老廣告口號：「有我咁平，冇我咁正！有我咁正，冇我咁平。」中環歷山大廈名店81/2令不少老外折腰，有一位洋人本來要放假，但聽到話有午餐約會在81/2，佢竟然話：「我可以推遲一日先至放假嘅。」老實講，與Zanotti相比，左丁山唔覺得81/2有甚麼優勝之處，Zanotti一客ParmaHamPizza，去邊度搵呀。
六個人點咗八個菜分嚟食，食到飽飽之後，分兩架的士返酒店，一架風馳，七分鐘即至，另一架就轉右轉左又轉右，搞咗十五分鐘，的士費多咗一倍！一宿無話，次早兩位九十後吃過四季之豐富精緻自助餐，十分聽話，肯跟埋一齊去拜就在街口之四面佛。學生H明年考高中文憑試，非常緊張，孭住一個大背囊出街，重到好似內有幾嚿石頭，左丁山對佢講：「喂，帶樽水，一條毛巾就得啦，點解你個背囊好似咁重嘅？」學生H話：「我帶埋Phy、Chem、Bi三本書及練習嚟㗎，有時間就溫書吖嘛！」沙田陳太以為在開學前帶仔到曼谷玩吓，等佢輕鬆吓，先至開學，殊不知學生H連「緊張」一併帶埋嚟，搞到左丁山都有啲戥佢肉緊，三三四學制第一屆考試，確係令到學生坐立不安，父母驚埋一份！
拜四面佛之時，左丁山教學生H在四面裝香禮拜，同佢講：「請四面佛保佑你明年考試四科A啦。」佢果然收起嬉笑面孔，認真地雙手合什為禮，口中唸唸有辭，大家離開之時，左丁山講解對面之Zen廣場高樓，因示威抗爭而受大火破壞，至今未修復，引伸至泰國式民主，城鄉差距，農民vs曼谷市民……講得太多，都唔知學生H明唔明，但如果明年通識科居然會出現一條泰國題目嘅話，希望佢記得其中大概。後來記得問學生H：「有冇求四面佛攞四個A呀？」學生H答：「我講咗八科A呀，得一半都有四科啩！」左丁山大笑，求佛攞A當然係入鄉隨俗之言，不得當真，唔勤力讀書就永遠攞唔到A，天才神童例外。後來我地去到商場Emporium嘅foodcourt，放低學生H坐響度食米粉，溫習物理課本，其他人就去逛商場購物去也！