開心飛起：夾實大髀尋海豚　$50蠔食半打

袋鼠島是澳洲第三大島，有4個香港般大，島上人口卻未夠5,000。警察3個，消防員2個，郵差1個，醫生每星期來1次。一條路上有4架車叫嚴重塞車，三分之一範圍是5個野生保護區及國家公園，綿羊、野生袋鼠同Wallabee的數目叠馬過人多多聲。

記者、攝影：陳慧敏
鳴謝：國泰航空、南澳旅遊局（http://www.southaustralia.com）

塘鵝食厭海參

由9月至11月，是澳洲的春天。10月中以前，百多種野花開滿小島，是顏色最繽紛的時間，如合金歌、紅千層、各種蘭花野花開滿森林，連森林名都變了「果醬撻森林」或「雞蛋培根」花，老人家John說時還笑得像個孩子。晨早我們來到EmuBay的碼頭，乘船出海看海豚，更重要是食蠔做早餐。碼頭上兩大列塘鵝在發吽哣，不是其中幾隻時而展開翅膀扮chok博上鏡，或突然跳下水搵食，還以為隻隻是假的。海灣的水清如玻璃，海底散落住海參同象拔蚌。船主說：「牠們食厭了海參，現在只食象拔蚌。亞洲人見到象拔蚌同鮑魚都好興奮，但我們經常食，好厭。」

■早上5時半，成排塘鵝食完早餐無事做，在碼頭迎賓。

■好些塘鵝還不怕人，主動游過來八卦一番。

灰黑三角旗飄揚

船來了。「待會開得快，大髀請夾實！」雖然是春天，但晨早快船上寒風刺骨好凍呀！我們頸巾披肩帽子全笠上，成船人變「碌葛」（註：SouthPark集集死而復生那個）！出海不久我們就關掉引擎靜候，未幾就見幾抹灰黑三角旗掩揚而過。3條、5條、10條！一大群約20多條海豚、時而三兩條一組迎面衝來，劃着漂亮的弧形由船底左邊滑到右邊，滿船龍友向左向右，跨來跨去。團裏cool到震的攝影師「龍五」──大款味濃的麻甩商人，吊着兩行鼻水，眼裏閃閃令地笑着追海豚。等天氣暖和之時，就可下水與海豚共泳。喂，我轉來轉去都只見灰色影閃過，海豚尾都影唔到，倒望見一地海參鮑魚象拔蚌。阿叔笑笑口：「班海豚有心玩你，總在你背後擦身而過，太可惜了！」

■見到3隻海豚嗎？原來我們船底下有一群在伴游呢！

■澳洲第三大島袋鼠島，有4個香港咁大。

攤獅海豹灣

離開海中心，船又駛向近岸，平靜的海水變成閃亮的鏡面，漁船像彩筆一樣在畫布上拖過一條裂痕，幾秒鐘後劃開的白雲又糊在一起，好一面治癒系的天空之鏡。鄰近還有海獅公園SealBayConservationPark。海岸邊，肥碌碌的最多600隻的肥獅瞓在灘上，擠在一起曬太陽。肥碌碌粉白的斑點身軀，出外搵食三、兩天就回來攤唞長曬，直至肚餓。有時舉起個頭已經令人大叫：「嘩，你睇那隻幾生猛？」突然有隻由斜坡上衝下來往海裏奔去，全團舉機想影奔海一劇，怎料奔到距海兩、三米前突然撻低……瞓下。有無咁懶呀！約$84入場費就有保育員，跟你「潛」近海獅影合照。

■這幾隻已是最生猛，很難想像牠們一口氣潛到240公尺深海底下覓食的樣子。

鮮蠔無限試食

靚山靚水，終於來到此行重點，去蠔場食早餐！我們還未從平靜如鏡的靚水中玩夠，背後開始見立在水面的蠔場，還有遠處在打撈海膽的海膽船同蛙人。在岸邊有家庭營業的海鮮店，這裏的人食蠔食鮑魚食到厭，半打即開生蠔不過$50起，仲可以無限「試食」才決定買邊款。此時切忌貪心唔大唔食，中型蠔永遠比大型的美味。入口卜卜聲，海水味同肉汁填滿嘴裏，好新鮮但好鹹呀！有人喜歡有人則覺鹹到話都說不出。老闆娘自家推薦熱食青口，層層叠的肉質卻極creamy，也是必試之選。