巴塞隆拿上周五喺歐超盃贈波圖雙蛋，真係要幾威有幾威，賽後有西班牙媒體話應該封呢隊波為史上最強。我求大俠覺得太抽象，實際啲，點計都係法比加斯最威，佢喺巴塞比賽10日就兩度捧盃（唔計友賽性質嘅甘柏盃），錦標數目係佢喺阿仙奴8年嘅總和，即係話，10日=8年？
贏波圖2:0捧歐超盃
實在難怪當日法比仔為返老家而望穿秋水，前個禮拜喺西超盃後備踢一陣就幫手砌低死敵皇馬；到上周五對波圖又係末段上陣，就射入回巢後正式比賽第1球，幫隊波埋齋兼捧盃，法比仔賽後唔敢邀功，第1個多謝美斯，佢話：「我同美斯係有一段長時間冇合作，但細細個就合作5年，信我，我對佢了解好深。佢送個靚波畀我，我就把握到機會。」
呢場波，美斯又真係好光芒四射，佢喺上半場39分鐘把握敵將古亞連誤傳，扭過門將射入。到下半場85分鐘，佢又博得路蘭度犯規導致兩黃變一紅。3分鐘後，法比仔接應佢嘅傳波後用心口控定後射入埋齋。古亞連其後老羞成怒侵犯馬斯真蘭奴領紅，波圖9人應戰，輸波輸品。
哥帥沙維創捧盃紀錄
呢場波對法比仔意義重大，對美斯都係，事關佢首次代表巴塞比賽，就係03年友賽波圖，嗰場波咁啱又係巴塞贏2:0，好邪！咁仲唔止，教練哥迪奧拿同埋中場沙維齊齊破球會紀錄，哥帥領先3年就幫球會贏得12個錦標，而呢個係沙維為巴塞贏嘅第18個錦標，都係前無古人。
呢場波仲有一段小插曲，就係當巴塞球迷喺場邊鬧皇馬教練摩連奴，教練哥迪奧拿行近球迷勸止，相當有風度。又係嘅，家陣佢要風得風，要雨得雨心情靚絕，畀你都有風度啦。