詩中有畫、畫中有詩，十里煙雨霏霏江南山水，唔單止可以睇，可以心領神會，原來仲可食晒落肚。八方噚日去到李錦記位於大埔嘅廚藝中心，就食咗成個江南。
意境菜台北成功爭霸
八方唔係食到儍咗，而係有123年歷史嘅本地醬油老字號李錦記，主席李惠雄今年5月組團出戰台北「世界廚王爭霸賽」，佢搵咗北京名廚、國際級賽事評委屈浩師傅做領隊，帶領埋當今譽滿京城嘅年輕名廚石秀松、侯新慶、陳慶及李可，合作炮製近年喺內地流行嘅新派意境菜，六道菜式主題為「煙雨江南．水墨山青」，一舉將日本、韓國、新加坡、台灣、荷蘭等28支參賽隊伍擊敗，成為世界廚王。
噚日五大名廚來港獻技，筵開三席，喺本地食家唯靈、名廚周中師傅面前炮製得獎菜式，分別係冷盤「雙映成輝」、熱湯「頂湯同心結」、熱葷「方圓之間」、「鹽焗醬香鴨」及「魚米之鄉」，仲有點心「江南美點」。
將江南山水意境入饌，確係新鮮，屈師傅話有次喺電視台舉辦嘅舞蹈比賽中，見到一對男女翩翩起舞，身後有一幅動態江南水鄉畫面，原來可以將人文、舞藝二合為一，激發以江南淮陽菜做意境菜參賽意念。
意境菜就係「以味道為核心」、「皿中有景」嘅菜式，為食客帶嚟味覺享受，又將中國數千年嘅繪畫、盆景、建築、人文風格，以拼裝技法活現碟上，變成一道立體「3D」藝術寶鑑，做到「一菜一景象，一菜一意境」。
八方現場所見，中西合璧菜式異常精緻，同香港新派fusion菜異曲同工，其中一道頂湯同心結，將鯛魚打成魚茸麪條再編成雙層中國結，好考功夫。負責嘅陳慶師傅話苦練兩個月先成功打好個結，仲要老婆親自教授。
得獎菜式市面暫無售
李錦記做醬油生意，參加廚王比賽好似撈過界喎，李惠雄話李錦記經常同廚師交流，好希望將中菜發揚光大，所以近年好積極出戰國際賽事，家考慮同飲食集團合作推出上述得獎菜式，等多啲人可以享受食得又睇得嘅美食。
出戰台北 番茄爛晒
百年老字號李錦記派名廚大軍參加廚王大賽，領軍嘅屈浩師傅同其他名廚閉關苦練兩個月後，帶齊食材、工具，浩浩蕩蕩、信心十足咁飛去台北，點知一出機場打開運過去嘅行李箱，就幾乎要打道回府，真係一殼眼淚。
北京大董烤鴨店行政總廚石秀松同八方講，佢哋一打開啲行李箱，發現用嚟做冷盤雙映成輝嘅番茄全部爛晒，啲盆同碟通通碎裂，拌菜雕塑蓉蓉爛爛；見到咁嘅情況，班名廚心到都凉咗一截。不過佢哋久經風浪，冷靜後即時設法補救，幾個大師傅分頭行動，去當地超市同街市買番茄、碗碟，至於啲蔬果雕塑就返魂乏術，惟有頂硬上用牙簽等小道具修補，慶幸過到關，最後贏埋廚王，喜出望外。
資料來源：李錦記
mailto:[email protected]
