呢兩日IT界認真多事，HPTouchPad減價七成半清貨，全球就齊齊撲貨，香港更係紅到不得了，個個喪鬧入唔到定單，代理更涉嫌未賣先斷貨。筆者忽然多咗老友蒲頭託買TouchPad，佢哋連無中文輸入、無更新、Apps支援不足都唔知，總之見平就搶。
另一單影響全世界嘅，係喬布斯辭去蘋果行政總裁。接任人庫克，十幾年前跟喬布斯，一個度出iMac、iPod，一個就搞生產線外判，將瀕臨破產邊緣嘅蘋果，成功起死回生。當初庫克由Compaq投身奄奄一息嘅蘋果，就係憑喬布斯一句：「你想賣糖水，還是改變全世界？」同樣都係潮語金句，對比「反正我信了」，成功人士講嘅總係多出一份營養。