鍾意睇粵語長片嘛？有機關嘅地方總有寶物！惡搞803呎YoHoMidtown中型單位，客廳一道隱藏式仿石牆，將客廳和內室變二進式，公私分明，戶主話地方實用咗，設計有層次又華麗，放盤隨時叫高$100萬！不過唔捨得賣囉，屋企有三房長走廊者值得借鏡。
一道石門一個整體
一般三房兩廳單位，都係入門為客飯廳，正中對長走廊，走廊內中間細房對廁所，屋尾一對眼鏡房。老派人會覺得風水上有冲煞，就算從室內設計角度，長廊不美觀亦係種浪費。設計情報中心設計經理SteveChung：「將客廳大牆同長廊大門連成一個整體，令客飯廳感覺更歸一，間屋亦唔會予人一眼望穿嘅感覺！」全屋以黑白為主調，白牆身、黑梳化、矮白地櫃、黑色紗簾，突然來一道灰色石牆，馬上成全屋焦點。這道灰牆起用了新石頭漆物料，有如魚缸的生物石，帶着點點粗糙感覺，統一黑白色系中又帶點變奏：「飯廳Display櫃、飯枱吊燈、玄關鐵線吊燈，還用了鏡鋼材質，多了這些強調位，令整間屋充滿變數！」
直線條波浪紋
推「牆」而入，走進內室另一個世界！長廊的侷促壓迫感無晒，因為中間細房的牆身不翼而飛，連帶走廊位變身一個長條狀的特大號書房。左邊為大間格Display式層架，右手邊則是一列天連地的大型書櫃。屋主是愛書人，可以話係完全貼身設計。不過，書房橫直線條多，加上近4米的深邃格局，初看難免感覺太硬，不過Steve巧妙地用上波浪紋Outline書櫃，令整體設計多了一分活力；再加上透明水晶電腦椅、特大號白地磚，空間感又返晒嚟：「石頭漆暗門仲有個小功能，就係有輕微嘅隔音效果！」哪管客廳炸機煲碟，二進的內室為「小石門」所屏蔽，設計除為了美觀，還有實用功能才算上品！
百葉窗異形艙
書房再內進，就是原本在屋尾的眼鏡房。不過「眼鏡」不見了，變為二合一的主人房連衣帽間：「由於書房為開放式設計，主人房得以向長廊外延伸多幾呎，令空間感大增！」睡床橫放在房間中央，床頭背靠窗，老土講風水，呢種叫無靠山，對主人不利；從現實角度，窗外樓望樓，無景！Steve索性運用百葉窗通風但屏蔽的實用性，令窗門隱藏變為一幅牆：「百葉窗原本同Modern設計可以話完全扯唔上關係，所以我再外套了一個類似蜘蛛網紋的金屬外框，用不規則線條將老舊感覺遮蓋！」戶主陳生係《異形》Fans，佢都大讚呢個舊材料新活化有種異形太空艙嘅現代感！
單位資料：元朗YoHoMidtown
面積：803呎
裝修費：32萬