香港大學慶祝一百年校慶，本是香港盛事、中國盛事，因為港大在不同類別嘅世界大學排名榜上，普遍排名高於中國最著名嘅北大、清華、復旦，在任何國家，都會被視為教育重鎮，領導人親臨恭賀，不足為奇。只可惜，一九四九年以前嗰種禮賢下士風氣，在知識分子被打擊為臭老九，教授要下鄉，核子專家要落區入廠做勞動工人之後，在整個神州大地，已不可復見，要或間中有之，做騷多過真情。時人講及大學校長最佳樣辦，每以北大蔡元培為尊，每每指責今日之大學祭酒，不似蔡元培咁有風骨。殊不知昔年即使係北洋軍閥老粗，對讀書人皆有一份崇敬，對啲大校長不敢無禮，點會好似自認飽覽中國線裝書、精通紅樓夢、資治通鑑嗰位毛澤東咁，將馬寅初校長玩到殘，踐踏為爛泥吖，後來再搞一場文化大革命，鬥垮鬥臭知識分子呀、教授呀、文人呀，全部遭殃，腰骨全被打斷，確定中國領導人高高在上，凌駕任何大學校長，邊一位中國之大學校長唔係黨員，唔受大學黨委書記監察呀？想學蔡元培呀！唔可以傲然拂袖而去嘅噃，馬寅初就是殺雞儆猴嗰隻雞。
蔡元培係一九四九年以前嘅產品，今天時空與政治現實完全不同，再講蔡元培，未免陳義過高，流於空談。李克強到港大參加百年校慶聚會，不知是否「自由行」，據報道，徐立之講：「對方要求嘅」，但一位消息人士就話係港大主動要求特區政府代為邀請嘅，國家領導人到訪港大，唔知事先有冇人向副總理辦公室幕僚獻計，容許一啲異議人士坐在陸佑堂內，如果有人向佢大嗌口號，向佢擲鞋，咁就港大發達咯，贏得言論自由美名，李克強亦贏得開明美譽，增加明年榮升總理之聲勢。不過，唉吔吔，中國官場傳統，係大人出巡，官差鳴鑼喝道，百姓肅靜迴避，領導人尊嚴不容冒犯，否則保安官員一概撤職查辦，即使有聰明人如此獻計，必定被當場斥退，以後難望有前途。徐立之校長係一位科學家，幾難要求佢有機心及政治頭腦，總之對方有乜強烈要求，一於照辦可也。徐立之倘有任何錯失，豈是個人一人之事，香港大學嘅Court與Council成員，難道沒有責任？