世事有時幾巧合，左丁山於八月十九日有曼谷之旅，帶沙田陳太一家人去曼谷食靚嘢，行前想話通知家在曼谷之財務A，希求一聚，飲吓下午茶最好，點知同時間就接到財務A嘅電郵，佢話十九號來港，希望左丁山帶佢去沙田馬會視察宴會場地。撞到咁正，真係無話可講，只得安排小YY招呼財務A。財務A有兩位千金，在曼谷美國國際學校畢業，到美國留學，大女自布朗畢業後，正攻讀博士學位，二女就畢業後，考入醫學院，兩位仲有排讀，有女讀書咁叻，自然值得高興，但以一份薪水供兩女兒留美，讀最貴嘅科目，財務A都算係偉大父親，左丁山要向佢致敬。
一行六人，於十九日下午抵達曼谷機場，自不然立即卜一架AOT小巴，直奔四季酒店，一程要一千二百銖，如果來回接送，就收二千一百銖，既然有得慳，自然同時卜埋來回接送。唔駛二十分鐘，Van仔已經到達市區，但跟住塞車塞到寸步難行，一個鐘頭過後，沙田陳太問司機：「咁究竟幾時先至到FourSeasons呀？」司機答得妙：「Madam，好近啫，還有兩公里，但亦都好遠，現在嘅車速係每小時行一公里。」
我地聽完，幾乎暈低，一早已卜定Zanotti晚餐，八時半前要到，如果兩小時先至行兩公里，到達酒店之時，已經係八點半啦，但如果直奔Zanotti，一車行李如何擺放？曼谷交通係煩死人嘅，我地仲揀正星期五晚上最繁忙時間進入市區，真係講出嚟都冇曼谷人可憐我地。好彩仲有少少運氣，司機左衝右突搶位之下，及時衝過黃色交通燈，四十五分鐘之內行完兩公里，抵達四季酒店，我地匆匆辦完手續上房，七點幾就走出酒店搭的士去Zanotti，為免塞車，兵分兩路，左丁山與兩個九十後走去搭高空鐵路（Skytrain），一個站啫，幾分鐘後就到SoiSaladaeng落車行路，十分鐘後到達Zanotti，點知沙田陳太已經坐咗響度，佢笑笑口話：「唔塞車好快到。」曼谷就是如此，約人見面，想話計準時間，一啲都唔容易。