英超成立以來，阿仙奴幾乎每季都是曼聯的爭標大敵。每次對壘，入球未必多，但紅、黃牌一定多，兩隊球員都加倍落力，踢法勇悍，絕不錫身，積下無數「牙齒印」。
雲佬韋拉常做主角
03/04球季，曼聯主場打和阿仙奴0:0的比賽中，阿仙奴隊長韋拉禁區內侵犯曼聯前鋒雲尼斯達萊（雲佬）被判12碼，阿仙奴球員投訴雲佬插水。最後雲佬射失，阿仙奴球員隨即包圍兼揶揄對方，之後便發生身體碰撞，其中阿仙奴中堅基昂打中雲佬。英足總秋後算賬，阿仙奴被重罰17,500鎊，而旗下4名球員羅倫、基昂、韋拉及柏奴亞更被停賽1至4場不等。
之後一季，曼聯於奧脫福憑雲佬及朗尼入波，以2:0擊敗阿仙奴，打破對手49場英超不敗紀錄。賽事中，雲佬惡意踩向阿仙奴後衞艾殊利高爾的膝蓋，球證走漏眼。雖然事後足總罰雲佬停賽3場，但艾殊利高爾一度揚言入稟法院控告該荷蘭射手，最後雲佬公開道歉。另外，賽後兩隊於球員通道發生衝突，混亂之中，曼聯領隊費格遜被薄餅打中面部。
當年「阿曼」大戰的另一焦點，非兩軍的火爆隊長韋拉和堅尼莫屬。在該季次循環，二人甚至在球員通道大打出手。賽前，韋拉挑釁曼聯後衞加利尼維利，堅尼為隊友出頭，與韋拉以粗口互罵，並互掐對方頸部，幸得球證及時阻止。
青蛙仔
